Shillong, Ïaiong 12 : Ka United Democratic Party (UDP) ka la pynpaw ba kan kyrshan pura ban pynlong ïa ka Ktien Khasi kum ka Ktien Sorkarf ha Meghalaya bad ruh ban ïakhun na ka bynta ban pynrung noh ïa ka ha ka Khyrnit kaba Phra jong ka Riti Synshar jong ka Ri.
Katkum ka kyrwoh ba la pyllait da u General Secretary ka UDP, Bah Titos W Chyne la ong ba ka UDP ka ai ka jingkyrshan kaba pura ïa ka Khasi Authors’ Society (KAS), kaba la mih ban ïakhun na ka bynta ban kyntiew kyrdan noh ïa ka Ktien Khasi na ka ‘associate official language’ kaba don hapoh ka Meghalaya State Language Act, 2005, sha ka Ktien Sorkar kaba pura.
“Ka UDP ka ju ieng skhem halor ka jingdawa ban ithuh noh ïa ka Khasi kum ka ktien sorkar ba pura jong ka jylla Meghalaya. Kane kam dei tang ïa ka ktien, hynrei ban ïada ïa ka jinglong tynrai, ka riti dustur bad ka pateng jong ngi,” ong u Bah Titos.
Une u general secretary ka UDP u la ban jur shuh shuh ba ka jingpynrung ïa ka ktien Khasi ha ka Khyrnit ba Phra ka long kaba dei hok bad kaba donkam, da kaba kdew ba katto katne kiwei pat ki ktien ha ka thain kum ka Bodo bad Manipuri ki la dep ïoh ïa ka jingithuhha ka Riti Synshar ka Ri.
