Nongstoiñ, Ïaïong 10: Na ka bynta ban bteng shuh shuh ïa ka jingpynshai paidbah halor ka kam thoh kot ka tnad trei kam jong synjuk ki nongthoh kot kaba la tip kum ka Khasi Authors Society shnat Mairang area kan puynlong ïa ka jingpynshai paitbah ha Mairang ha phyllaw jong ka Tirot Singh Memorial hall ha ka por 1 baje nohphai sngi jong ka 14 tarik Ïaïong.
Ha u kyrwoh ba la pynlait mynta ka sngi da u secretary ka synjuk shnat Mairang la ong ba ka jingthmu ba kongsan jong katei ka jingïalang ka long ban pynshai ba na ka por sha ka por ka synjuk la la ïai dawa na ka sorkar pdeng ba kan pynrung noh ïa ka ktien Khasi ha ka khyrnit kaba phra jong ka riti synshar ka ri. U la ong ruh ba ka synjuk ka la sngew donkam haduh katta katta ba ka sorkar jylla kan ithuh noh ïa ka ktien Khasi kum ka Official Language ha baroh ki jingdon kam khnang ba kan pynsuk ïa ki paidbah haba ki leit don kam ha ki ophis bapher bapher khamtam eh haba ki ioh ïa ki kynja apllikeshon sha ki tnad trei kam jong ka sorkar na ka bynta ki ba bun ki jingdonkam.
Kumta u Bah Nonglait u la kyntu ïa baroh ki para dkhot jong ka synjuk kumjuh ruh ïa ki paidbah ba kin ïa wan ha katei ka sngi khnang ba kin sngewthuh ïa ki mat kiba donkam ba ka synjuk kan pynshai.
