Donkam ba ki nongmihkhmat kin dei ki nongthaw aiñ ban thaw ïa ki aiñ ha ka kam dewïong: Sambormi

Khliehriat, Ïaïong 7: U Bah Sambormi Lyngdoh uba dei u President jong ka Jaiñtia National Council bad uba dei ruh uwei na ki dkhot jong ka Jaiñtia Coal Miners and Dealer Association (JCMDA), haba kren ha ka jingïalang ba la pynlong da ka JCMDA ha Dkhiah u la pynpaw ba u don ka jingangnud ban don ka aiñ kaba bit ba biang kaba ïadei dur bad ka kam tih dewïong hapoh ka jylla Meghalaya, da kaba ong, “Ha jingshisha la donkam ban pynkylla noh ïa ka ktien nongmihkhmat sha ka ktien nongthaw aiñ khnang ba kin lah ban thaw ïa ki aiñ kiba biang bad kiba ïadei dur bad ka jinglong jingman jong ka jylla”.
Utei u nongïalam ka JNC u la ong ruh ba kane ka jingpynlong rally ka Jaiñtia Coal Miners and Dealers Association mynta ka sngi ka dei tang ka jingsdang bad kyntu ruh da kaba ong ba ai ba kane ka ding kan pyn pluh ha ka jylla baroh kawei, ha kajuh ka por u la ai ka jingïaroh ïa baroh ki nongïalam ka JCMDA hapoh ka jingialam u President u Bah Borin Shadap bad kitbok kitrwiang ruh ba ka Association kan nang lah ban ïaid shakhmat ha ka kam kaba na ka bynta ka jingbit jingbiang ki paidbah ka district kiba im kamai ha ïing ha sem da ka kam dewïong.
U tei u nongïalam ka JNC u la ong ruh sha baroh ki paidbah ba, “Ai ba ka jingdon lang jong ngi hangne kan pyni ba ngi thngan ym tang ïa ka kam tih dewïong, hynrei ngi thngan ruh ïa kata ka aiñ kaba ïadei dur bad ka kam dewïong,” da kaba kyntu ruh ïa kiba thaw aiñ ba ki dei ban da bishar bha ba ka aiñ kaba ki shna kan long kaba lah ban ïada ruh ïa ka lawei ka ban wan, u kyntu ruh ïa ki paidbah ba kin ai ka jingïatreilang haduh ban da poi sha ka thong ban pynurlong ïa ka jingdawa ban ïoh biang ka lad ban tih bad shalan dewïong.
“Ki don ki jingjia kiba ju jia ha ki jaka trei dewïong ne ki accident ha ki jaka tih dewïong ha kaba ka sorkar ka la kem bad ong ba thung ïa ka kynhun tohkit, hynrei haduh mynta ym pat don satia kata ka tohkit, kaei kaba pynlong ïa ngi ban trei tuh ne trei buhrieh ne trei beaiñ, kane ka dei ka jingkylli kaba khraw bha, namar da ka jingtrei tuh ka sorkar hangta kan sa pynïoh ïa ka aiñ, kumba ong kiba heh ba san ba balei ba mih kiba tuh, ka daw ka dei namar ba thngan, na kata ka daw ka sorkar ka dei ban sngewthuh shai ïa kata ka aiñ kaba ïadei bad ka khyndew ka shyiap, kaba ïadei dur bad ka riti ka dustur ka jong ngi, haba peit ïa kane ka baner jong kane ka rally jong ka JCMDA kapaw ba ka dei ka jingtrei kaba long tynrai ne kata ka tradational mining, kane ka kit ïa kata ka lyngkor kaba khia, kaba pynpaw ïa kata ka riti ka dustur khamtam ha ka jinglong trai ïa ka khyndew ka shyiap ba ym dei satia ba kiwei kiba na bar kin wan trei ïa ka kam kaba dei ka kam tynrai ne ka traditional. Ngi dawa ruh ïa ka policy bad ha ka policy ki dang don ki jnit ki jnat kiba ngi hap ban bud ban dup ioh ban trei ban ktah, hooid ki heh ba san ki la dep ai ha ngi ïa ka Sixth Schedule kaba long kata ka jingiada ïa ngi, lada ngi ïakhih da kaba tyngeh ka sorkar ka hap ban sngap,” la bynrap u bah Sambormi Lyngdoh bad ïathuh ruh ba ïa kane ka rukom tih dewïong thliew khnai ne ka rat hole mining ha Nagaland la dep shna aiñ ïa ka kum ka Nagaland rathole mining Policy, kaba tip kum ka Pocket Mining, la lah ban shna ïa kane ka aiñ namar ka Nagaland ka don ïa kata ka article 371-A kaba dei ka hok ba kyrpang ban ïada ïa ka khyndew ka shyiap, kumta u kyntu ïa ki paidbah ba ki aiñ, ki kyndon ha ka kam tih dewïong ki long kiba donkam ban lait na ki aiñ ki bym iahap bad bym ïadei dur bad ka jylla.