Wat ap haduh ba paidbah kin da bitar ban leit ïa khih ha khmat ka Ïing Dorbar thaw aiñ ha Secretariat: Roy Synrem

Mawkyrwat, Ïaïong 06 : Ki kynhun Sengbhalang bapher bapher kiba hapoh jong ka Mawsynram C&RD Block mynta ka sngi ka 6 tarik u Ïaiong, 2026 ki la pynlong biang ïa ka jingïalang paidbah ha Ïew Mawsynram, East Khasi Hills District na ka bynta ban pyrshah halor ka jingaiti ka sorkar lyngba ka Tnad MePDCL sha ka SAI Computer Limited ban sam bording haki thaiñ Mawsynram Sub-Division.
Ha kane ka sngi, ki kynhun Sengbhlang ki kynthup ïa ka HNYF, FKJGP, bad HYC la ïoh ruh ban ïashimbynta da ki Seng Longkmie bad ki rangbah shnong bapher bapher ha kajuh ka por ki la pynlong ruh ïa ka Signature Campaign ban pyni ïa ka jingpyrshah ïa kane ka SAI Computer Limited kaba shimti mynta ban sam bording ha kane ka thaiñ.
U bah Roy Synrem uba dei u President ka HYC Central Body u la buh jingkylli ïa ki lai ngut ki MLA kum ki nongmihkhmat jong ka Mawphlang, Mawsynram bad Ranikor Constituency kumjuh ruh ïa u Minister ba mynta u ba bat ïa ka Tnad sam bording kiba dei na ka juh ka party hato balei kim lah mo ban pynbeit ïa ki jingeh jong ki paidbah ïa ka khia ka shon na ka ban weng mardor ïa ka jingaiwai sha ki kompany bar jylla ka SAI Computer Limited ban sam bording ha kane ki thaiñ.
Shuh shuh ha ka jingkren jong u, ula ong ruh ba kum ki nongmihkhmat ki dei ban don ka jingkitkhlieh, kumba ki paidbah ki la ai ka bor ban shong ha ka shuki kum ki nongmihkhmat ne MLA bad lada kim lah ban leh ei ei ban ïa kren bad ki bor Sorkar ki dei mih noh na kata ka sorkar synrop ba ki ïa donlang bad ym tangkata wat ap ruh tat haduh ba paidbah kin da bitar ban leit ïa khih haduh ha khmat ka ïing Dorbar thaw aiñ ha Secretariat.
Kiwei de ki nongkren ha kane ka sngi ki kynthup ïa u bah Eldinewton Lyngdoh uba dei u General Secretary ka FKJGP Central Body, u bah Hesting Lyngdoh uba dei u Vice president HNYF bad na ka Seng Longkmie kmie kumjuh ruh na ki rangbah shnong.