SHILLONG, ïaïong 05: Ka Sputnik CC bad ka Rhino Cricket Academy ki la jop ïa la ki jong ki jingïalehkai Super 8 jong ka lympung Late P.A.Sangma Memorial T20 Cricket Tournament 2026 ba la pynïaid da ka Shillong Cricket Association, kiba long ha ka sngi U Blei ha madan kriket ha Polo.
Ka Sputnik CC ka la pyn-liem noh da 55 ron ïa ka ka Lok Bhawan CC ha ka jingïalehkai ba nyngkong jong ka Group 1, nangta ka Rhino Cricket Academy ka la jop da 62 ron ïa ka Capital Stars ha ka Group 2.
Haba shimti ban tied nyngkong ka Suptnik CC ka la lah ban kamai 163 ron bad khyllem 7 wiket haduh kaba kut ki 20 ober. La lamkhmat ïa ka tied da u Mark J V ingty (37 ron naki 29 bol) bad u Swarajeet Das (30 ron naki 25 bol). Ha kawei pat ka liang u Biksah Singha u la khur 2/35 naki 4 ober, katba u Suraj Chettri u la khur 1/21 naki 4 ober.
Ha ka jingpyrshang beh ïa ka thong ka Lok Bhawan CC ka la shah weng noh baroh 10 wiket tang na ka bynta ka 108 ron haki 17.4 ober, bad dei tang u Krishna Chettri (56 ron na ki 31 bol) uba la kham seisoh ha ka tied.
U Nafees Siddique u la pynkut ïa ka boling ryngkat ka jingkheiñ kaba 3/6 naki 2 ober bad khur ruh ïa ka khusnam Player of the Match, katba u Aditya Singhania u la ïoh ban khur 4/13 naki 4 ober.
Nangta ha ka jingïalehkai kaba bud, ka Rhino Cricket Academy ka la tied pyndep ïa ki 20 ober ban kamai 215 ron bad khyllem 4 wiket, ha kaba u Nihar Deka u la duna tang kawei ka ron ban kynjoh ïa ka spah ron (99 naki 52 bol); uwei pat u nongtied ba seisoh udei u Sumit Kashyap (40 ron naki 22 bol). Ha kawei pat ka liang u Abdul Ajij Kuraishi u la khur 2/39 naki 4 ober.
Haba pyrshang jubab, oydeep Singh u la noh synñiang 53 ron naki 34 bol hynrei ka Capital Stars ka la pynkut ïa ki 20 ober tang na ka bynta 153/9. U Tapan Kumar Sharma (4 ober: ailad 19 ron) bad u Nihar Deka (3 ober: ailad 20 ron) ki la khur mar 2 wiket.
Na ka bynta ka jingïalehkai kaba kyrpang ha baroh arliang, u Nihar Deka (khur 2 wiket ha ka boling bad kamai 99 ron ha ka tied) u la ïoh ban khur ïa ka khusnam Player of the Match.
