Ai jinghikai ka Star Cement ban kyntiew ïa ka khaïi ka pateng ha thaiñ Narpuh EJHD

Khliehriat, Iaiong 01 : Ka tnat CSR jong ka company Star Cement Lumshnong ha ryngkat ka jingiatreilang bad ka tnat Indian Institute Entrepreneurship Guwahati ka la pynlong ïa ka prokram ai jinghikai kaba lai sngi lynter ha Star Club ha kaba 25 ngut ki briew kiba na ka thaiñ Narpuh East Jaiñtia Hills District ki la wan ïa shimbynta ha kane ka jingshah hikai bad kine ki briew ki dei kiba trei ïa ki kam la jong.
Ïa kane ka prokram ai jinghikai la kynshan lang da ka Office Development Commissioner (MSME) jong ka sorkar India.
Ka kong Arti Lyngdoh kaba dei ka State Coordinator Meghalaya na ka tnat Indian Institute Entreprenureship Guwahi lem bad ka kynhun ka la ai ki jinghikai sha kitei ki 25 ngut bad kiba shah hikai ki la iathuh ba ki la ioh jingmyntoi shibun eh na kane ka jingshah hikai kaba long kum ka jingialam lynti ïa ki ban kyntiew ïa ka kam khaïi pateng kaba ki trei.
La ong ba na ka liang ka tnat CSR-Star Cement ruh kan nang ïai buddien shuh shuh ïa kine kiba la wan shah hikai bad hadien ka hynriew bnai ka tnat kan sa khot biang ban shah hikai shuh shuh khnang ba ki kam ki jam ba ki trei ha ka khaïi ka pateng kin kiew shaphrang.
La sakhi lang ruh ïa kane ka prokram ai jinghikai da u heh jong ka company Star Cement, u AVM, R.V.Ramkishore, uba dei u AVSM (retired) ba uba bat kum u Senior General Manager Star Cement Lumshnong, u Manager ka tnat CSR, u Kingshok.K.Borah.
Ka kong Arti Lyngdoh kaba la ai ki jinghikai ka la ai khublei ïa ka kynhun kaba na ka tnat CSR jong ka Star Cement kaba la pynlong ïa kane ka prokram kaba jop bad ong ba kane ka prokram ai jinghikai ba la pynlong ka dei ka Management Development Programme ka dei kaba kaba iatrei lang bad ka DCMSME,ka dei kaba ai jinghikai ha kaba ïadei bad kaba kyntiew ïa ka khaïi ka pateng, ka ïa die ïa thied.
Ka kong Arti Lyngdoh ka la ong ba “Ha kine ki jingai jinghikai ba la pynlong ha kine ki lai sngi nga lap ba ki don bun ki lad ki kabu hangne khamtam kane ka East Jaiñtia Hills District kaba dei ka district kaba bun bunjait bha ki jait kam ha ka khaïi ka pateng, ngi na ka kynhun ngi la ioh lad ban iakren bad kine kiba wan shah hikai bad ngi la ioh ruh ka lad ban aijingmut shuh shuh ïa ki ha ki jait kam bapher bapher ban kyntiew ïa ka khaïi ka pateng bad ka jingthmu jong ngi hi ka dei ba ngi ai mynsiem bad pynshlur ïa kine kiba leh ïa ki kam ha ka khaïi ka pateng ne ka Entrepreneure bad kumno kin pyniaid ïa ki kam ki jam da kine ki marpohkhyndew bad ki jait mar kiba don ha kane ka thaiñ hapoh ka district bad kumno ba kin ïaid shakhmat ha ka kam ba kynthup ruh naduh ka rep ka riang, ka ri jingri, kaba die dukan, ngi pynshlur ruh ïa ki ba kin mih shakhmat ban shim ïa ki jait skim bapher bapher bad nhi a ai jingmut ruh kumno ban sdang ïa ka kam, ïano ban iakynduh ban ioh ki lad jingmyntoi bad jingkyrshan bad na ka liang ka tnat Indian Institute Entrepreneurship ruh ki don ki skim kiban kyrshan ïa ki bad kaba donkam eh ka dei ba ki donkam ban shim ïa ki jingshah hikai bad lada ki ioh ïa ki syrnot kan kham pynsuk ïa ki ban ioh ki lad ban kyrshan ïa ki ha ka kam khaïi pateng bad nga ngeit ba kane ka Management Development Programme kan dei ka synjam ka ban plie lad plie lynti ïa kito kiba trei ïa ki kam la jong”
U heh jong ka Star Cement, Lumshnong, u AVM, R.V.Ramkishore u la ai khublei ïa baroh kiba la wan sha kane ka jingshah hikai kaba la pynlong ha kine ki lai sngi linter bad u la ai mynsiem bad pynshlur ruh ïa ki ba kin iaid shakhmat ha ki kam ki jam ba ki trei bad ong ba na ka liang ka CSR ruh kan sa nang buddien shuh shuh ban kyntiew ïa ki bad ai shuh shuh ki jinghikai ïa ki bad u la ai ruh ka jingkhublei kitbok kitrwiang ïa ki ba kin nang kiew shaphrang ha ki kam ba ki trei ha ka khaïi ka pateng.
U R.V.Ramkishore u la pynshlur ïa kiba wan shah hikai ba kin pyntreikam ïa ki jingthmu, ki buit jong ki halor kumno ban kyntiew ïa ka khaïi ka pateng bad ong ba kane ka jingai jinghikai kan iarap shibun ym tang ïa kiba wan shah hikai hynrei kan iarap ruh ban kyntiew ïa ki shong ki thaw.
Shuh shuh, haba kren sha ki pathai khubor, uwei u samla uba na ka shnong Brichyrnot, u Jenu Sutnga, uba la wan sha kane ka jingshah hikai ba la pynlong ha Star Club ha Star Cement, u la iathuh ba u dei u ba ju ialam lynti ne u Guide uba ju ialam lynti ïa ki nong jngohkai pyrthei kiba leit peitkai ïa ka kshaid Chyme kaba itynnad bad kaba paw bha ha ka thaiñ Narpuh kaba la khring bun bha ki nongjngohkai pyrthei na kylleng ki jaka, u la ong ba u la ioh bun ki jingai jingmut bad ioh mynsiem ruh na kane ka jingshah hikai, une u samla u la wan sha kane ka prokran ai jinghikai namar u don jingmut ban kyntiew ïa ki kam ki jam bad u don jingmut ruh ban shna ka jakasah ne ka Guest House na ka bynta kiba wankai sha kane ka jaka ban don ka kshaid Chympe, hajan bad sawdong kane ka kshaid ki don ruh ki lum ki wah, ki krem, ki kroh kiba itynnad bha bad ka khlaw ba rben kaba iakynduhlang bad ka Narpuh Wildlife Sanctuary, na kata ka daw kane ka jaka ka khring bha ïa ki nong jngohkai pyrthei kiba na jan na jngai, wat kiba na bar ka jylla bad na bar ri ruh.
Ki 25 ngut kiba la wan shane kane ka prokram ai jinghikai ki kynthup ruh kito kiba shing dukan, kiba ri jing ri, kiba ieng hala ki jing ki kjat ha ki jait kam bapher bapher ba ki trei.