Shillong, Lber 31: Ka Directorate of Food, Civil Supplies & Consumer Affairs lyngba ka kyrwoh khubor ka la pyntip ba ka jingsam ïa ka domestic LPG ha Meghalaya ka dang biang kumba ju long, bad la dep pynpoi haduh 22,094 tylli ki Cylinder Gas ne tyndong shet jingshet naduh ka 25-27 tarik u Lber lyngba ki 68 tylli ki trok ba la ïohpdiang da ki kynhun kiba sam gas.
Ka Tnad ka la pyntip ba la sam man la ka sngi 5,558 Cylinder ha ka 25 tarik u Lber, 9662 tylli ha ka 26 tarik bad 6,874 tylli ha ka 27 tarik bad kaba bun tam ka jingsam kadei ha ka 26 tarik kaba pyni ba ka la don ka rukom kaba biang bha ha ka jingsam ryntih.
La pyntip ba ka jingsam ïa ka gas ka la long kaba biang ha kylleng ki district da ka jingnoh synniang jong ka Sukbha Gas Agency, Meghalaya Gas Agency, Rymbai Gas Agency bad Ripnar Gas Agency.
Ka Directorate, ka la pyntip ba ka jingpan pyndap biang ne Booking la pynbeit thymmai ba kan long 25 sngi na ka bynta ki bym dei ki PMUY Domestic Consumer bad 45 sngi na ka bynta ki PMUY Consumer, ha kaba ka tnad ka la kyntu ïa ki longïing ba kin bud ryntih ïa kane ka jingbthah.
“Ym donkam ban khuslai,” ong ka kyrwoh bad ka jingpynpoi ka dei kaba la pynthikna katkum ka jingbuh por lada ïa ka jingpan pyndap biang kadei kaba la bud ryntih.
Ka jingsam ïa ki Commercial LPG ka la long kaba ïaid jai-jai, ha kaba 389 tylli ki Cylinder la dep ban sam ha ka 25-28 tarik u Lber da ka Ri-Bhoi Gas Agency bad ka Nangkiew Irat Indane.
Ka Directorate ka la ong, ba ka la pynlong man la ka sngi ïa ka jingjurip bad ka la ai ruh ïa ki jingpyntip sha ka Ministry of Petroleum & Natural Gas. Ki nong pyndonkam ki lah ban phone ha u Toll-Free Number 1967 lane WhatsApp ha u 9402327737 ban ïoh ïa ki jingïarap bad ki jingtip ba kongsan.
