Shillong, Naitung, 13: U Myntri Khynnah ka Sorkar Pdeng uba khmih ïa ka tnat Petroleum and Natural Gas bad Labour and Employment, u Rameswar Teli ha ka sngi Baar u la sam ïa ki LPG ba ai ei hapoh ka Ujjwala 2.0, ki E-Shram bad PM-SYM card, ki PPO bad ki Cheque hapoh ki skhim EDLI ki EPFO bad ESIC Card hapoh ka PRAYAS sha ki nongshong shnong jong ka jylla Meghalaya.
Ha ka jingïalang kaba la long ha Shillong Club, Shillong, shiphew ngut ki nongïoh jingmyntoi kiba sah hapoh ka East Khasi Hills District ki la ïoh ei ïa ki LPG.
U Myntri u la pynbna ba 62% jong ka thong jong ka skhim Ujjwala ka dei kaba la pynurlong ha Meghalaya bad u la kyntu ïa ka Sorkar Jylla ba kan trei borbah khnang ban pyndep pura ïa kane ka kam.
Sa khatwei ngut ki briew ki la ïoh ïa ki Pension Payment Order (PPO) lyngba ka PRAYAS na ka bynta ka Azadi Ka Amrit Mahotsav 2022. Hapoh ka Employees’ Deposit Linked Insurance Scheme, 1976 (EDLI), la ai ïa ka Cheque kaba T. 7 lak ïa san ngut ki briew ki ban ïoh mar T 1.4 lak. Shiphew ngut ki briew ki la ïoh ïa ki E-Shram card katba la ai ruh ïa ki jingmyntoi ka PM-SYM sha san ngut ki briew.
Haba kren shaphang ka Ujjawal Yojana, u Myntri u la ong ba ki briew, khamtam ki longkmie kiba la ïoh jingmyntoi na ka Ujjwala Yojana ki la bun bha. “Dang katto katne snem mynta, ki longiing ha ki jaka nongkyndong kim lait na ka jinghap pyndonkam ïa ka dieng, ki Stove umphniang sharak, u rnga, ka ieit masi bad kiwei kiwei,” la ong u Myntri da kaba kdew ïa ka jingktah jong kine ïa ka koit ka khiah jong ki longkmie bad ki khynnah khyllung ha ryngkat ka mariang. Hapoh ka jingïalam jong u Myntri Rangbah Duh, u Narendra Modi, ka tnat Petroleum and Natural Gas, ka la lah ban wanrah ïa ka ‘Pradhan Mantri Ujjwala Yojana’ (PMUY) kum ka skhim ban pynbiang ïa ka bording kaba khuid ban shet jingshet kum ka LPG na ka bynta kito ki longiing kiba kham duna ka jingïoh. Haduh mynta, 9 klur ngut ki briew ki la ïoh ei ïa ki connection LPG..
“Ka Seva, Sushasan bad Garib Kalyan ki dei ki kam ba ka Sorkar hapoh ka jingïalam jong u Myntri Rangbahduh, u Narendra Modi ka peit bniah bha ha kine ki phra snem ba la leit bad ka India ka la ïohi ïa ka jingkylla kaba khraw ha kaba ïadei bad ka rukom synshar kaba pyrkhat nyngkong ïa ka bha ka miat ki briew. La pyntreikam ïa ki polisi bad ki sienjam bapher ha ki kam bapher bapher ban pynbha shuh shuh ïa ki lad ban pynpoi ïa ki jingmyntoi sha baroh bad ban kyntiew ïa ka ri,” la ong u Myntri.
U la ong ba kine ki polisi ki ban jur halor ka jingpynbha ïa ki jingdon jingem, ka jingkyntiew ïa ki lad ai jingsumar, ka bha ka miat jong ki nongrep bad ka jingïada ïa kito kiba shem jingeh. “Shuh shuh, ka India ka la ïohi ïa ki sienjam kiba ïadei bad ka jingkyntiew ïa ki samla bad ka roi ka par lyngba ka teknoloji. Ka la ïohi ruh ïa ki jingpynkylla bapher bapher kiba thmu ban pynsuk shuh shuh ïa ka kam khaii ha ka ri. Ki polisi kiba ai jingmyntoi ïa ki longkmie ki la ïarap bha ban kyntiew ïa ka jingïashim bynta ki longkmie ha ki kam bapher bapher,” la bynrap u Myntri.
U la kren shaphang ka jingpeit bniah jong ka Sorkar Pdeng ban wad bad pynmih ïa ka umphniang bad ka Natural Gas khnang ba ka India kan lah ban pyndap ïa la ka jingdonkam bording, bad u la ong ba ka kam ban kot sha ka thong ban khleh haduh 10 % ka ethanol ha ka petrol ka dang ïaid shakhmat.
Kane ka jingkhleh 10 % hapoh ka prokram Ethanol Blended Petrol (EBP) ka la urlong shuwa ïa ka por ba la buh kaba long u Naiwieng, 2022, la ong u Myntri. “Ka jingpynbun ïa ka jingkhleh ethanol ha ka petrol ka long kaba donkam na ka bynta ka jingshngain ka ri ha kaba ïadei bad ka bording ban kan pynduna ïa ka jinghap thied umphniang nabar ri. Kane kan pynduna ïa ka jinglut jingsep ha ka jingshalan umphniang nabar ri bad kan pynshlur ruh ïa ki nongrep ba kin pynbiang ïa ka ethanol ka ban kyntiew ïa ka ïoh ka kot jong ki,” u la ong.
U Myntri u la ong ruh ba shen yn sdang ka jingwad ïa ka umphniang bad Natural Gas ha Meghalaya nalor kiwei kiwei ki jylla jong ka thaiñ Shatei Lammihngi. U Teli u la pyntip ha ka jingïalang ba yn sa buh ïa ki Gas Pipeline ha baroh ki jylla jong ka thaiñ Shatei Lammihngi. U la ong ba ïa ka projek ban buh ïa ki Gas Pipeline yn sa pyntreikam da ka Indradhanush Gas Grid Ltd bad ka kam na ka bynta kane kan sa sdang shen. Hapoh kane ka projek, la kynthup ruh ïa ka Meghalaya bad kane ka jingbuh pipeline kan long haduh Shillong, ha kaba ka kam na ka bynta kane kan sa sdang shen.
U Myntri u la ïamir jingmut ruh shaphang ki sienjam jong ka Tnat Labour and Empowerment jong ka sorkar pdeng ban wanrah ka jingshai bad jingkitkhlieh lyngba ki jingkylla bad ka jingpyntreikam ïa ki Ain Labour.
“Nalor ka jingplie lad ban pyntbit ïa ki sap treikam bad ka jingai jingtip ban sdang ki Startup ba thymmai, la ai jingïarap pisa ruh manla ka por sha ki jaka trei bad ki nongtrei ban ïarap ïa ki ha ki jingpyrshang jong ki. Ka EPFO ka la ai ki jingshakri jong ka lyngba ka bor internet na ka bynta ka jingmyntoi jong kito kiba don bynta ha kane bad ka la don ka jingpyndep kloi ïa ki kam ha kine ki snem ba ladep,” ula ong.
Ka skhim Prayaas kadei ka jingpyrshang jong ka EPFO ban pyllait ïa ka bai bam tymmen jong ki nongtrei, kum ka PF (Provident Fund) ha ka sngi ba ki shongthait na ka kam. La pyntreikam ïa ka Aatmanirbhar Bharat Rojgar Yojana da ka sorkar lyngba ka EPFO ban ai jingmyntoi ïa ki nongseng kam lajong bad ka jingplie lad ïoh kam ba thymmai bad haduh mynta kumba 60 lak ki briew ki la ïoh ki jingmyntoi ba la kot jan T. 5500 klur,” la ong u Myntri haba ai jingkren ha ka jingïalang.
Ha kaba ïadei bad ki jingai jingshakri hapoh ka Employees’ State Insurance Scheme of India (ESIC) katkum ka juk mynta bad yn bteng ïa kane sha man ki bynta jong ka ri, u la ong. Ka ESIC ruh kan pynïar ïa la ki jingdon jingem da kaba plie ki hospital ba thymmai bad kyntiew ïa ki jingdon jingem ba la don lypa. U Myntri u la ai jingtip ruh shaphang ka jinglong jingman ka E- Shram. “Ha ka sien ba nyngkong ha ka ri, ka sorkar lyngba ka rynsan E- Shram, ka la pynkhreh ïa ka National Database jong ki nongtrei kiba trei ha ki kam kiba lait na ka kam sorkar. Ka rynsan kan buh jingtip shaphang ki nongtrei kiba trei ha ki kam lait na ki kam sorkar jong ka ri. La saindur ïa ka rynsan ‘E-Shram – National Database on unorganised workers’ khnang ban lah pyntreikam bha ïa ki skhim bapher bapher ba ïadei bad ka jingshngaiñ ha ka imlang sahlang na ka bynta 38 klur ki nongtrei. Haduh mynta 28 klur ki nongtrei ki la pynrung kyrteng ïalade ha kane ka rynsan.”
Ha Meghalaya ar lak ngut ki nongtrei ki la pynrung kyrteng ïalade hapoh ka rynsan E- Shram na ka thong ba la buh khyndai lak, u la pyntip bad kyntu ïa baroh ban pynshlur ïa ki nongtrei kiba trei ha ki kam lait na ki kam sorkar ban pynrung kyrteng ïalade ha ka rynsan khnang ban ïoh ïa ki jingmyntoi jong ki skhim sorkar.
U Myntri u la ong ruh ba la sdang ïa ka PM-SYM (Pradhan Mantri Shram Yogi Maan-Dhan) na ka bynta ka jingïada ha ka por ba la tymmen, ki briew kiba trei ha ki kam ba lait na ki kam sorkar. Hapoh ka skhim unor-ganized worker (UW) ki briew kiba hapdeng ka rta 18 haduh 40 snem ki lah ban pynrung kyrteng bad kin ïoh ruh ïa ka pisa kaba T. 3000 hadien ba ki la dap 60 snem ka rta.
U Myntri u la kyrpad ïa baroh ban pynsaphriang jingtip shaphang kane ka skhim. U la ong ba ka sorkar pdeng ka la shim bun ki sienjam ban kyntiew ka jingpynrung kyrteng hapoh ka skhim PM-SYM.
Hadien kane, u Rameswar Teli u la pynlong jingïalang peit bniah bad ki ophisar jong ki tnat bapher bapher jong ka sorkar jylla ha kaba u la lum jingtip shaphang ka jingpyntreikam ïa ki skhim bapher bapher jong ka sorkar pdeng.
