Shillong, Lber 02: U Dr Virendra Kumar u Myntri ka sorkar pdeng ba dei peit ïa ka social justice bad empowerment mynta ka sngi ka 02 Lber 2026 u la khot ïa ka jingïalang ha Taraghar ban ïa kren ha kaba ïadei bad ki scheme ka sorkar pdeng kiba la pyntrei ha East Khasi Hills District.
Ha kane ka jingïalang la donlang u Bah Paul Lyngdoh MLA nongai buit ka sorkar ba ïadei bad ka tnad Social Welfare, ka Deputy Commissioner ka East Khasi Hills Kong R.M Kurbah bad ki ophisar na ka District East Khasi Hills.
Ha kane ka jingïalang ki ophisar na ka district ki la pyni ïa ka jingpyntreikam haba ïadei bad ki skhim jong ka sorkar pdeng hapoh ka district, ha kajuh ka por na ka liang jong ki ophisar kila pynsngew ruh ïa ki jingïatyngkhuh kam haba pyntrei ki skhim hapoh ka district.
Ha kane ka jingwan jngoh u Myntri ka sorkar pdeng kaba lai sngi lynter ula leit ban jngoh sha ki jaka bapher bapher kaba la pyntreikam ïa ki skhim ha kane ka District East Khasi Hills na ka liang jong u Myntri ha ka jingkren ka jong u ula ong ba hapoh ka jingïalam u Myntri Rangbah duh u Narendra Modi ka sorkar pdeng ka kwah ban pyntikna ba ki kam pynroi kin poi sha ki paidbah la ka long ha kino kino ki shnong.
