Nongstoiñ, Rymphang 26: Ka District Legal Services Authority West Khasi Hills (DLSA) Nongstoin, ka la pynlong ïa ka Legal Awareness Programme halor ka Legal Services to Children Scheme bad ka NALSA-ASHA Scheme ha Myndo Village, West Khasi Hills District.
Ïa ka jingïalang la pynïaid da ka kong D.M.K.S Shadap Secretary DLSA, West Khasi Hills. Ha ka jingkren jong ka, ka la ban jur halor ka jingdonkam jong ka jingïarap aiñ ei bad ka la batai shai halor ka jingïoh ïa ki jingshakri aiñ ei, ka NALSA 15100 Helpline, ka NALSA Legal Services Management System (LSMS) Portal, da kaba kyntu ïa ki paidbah ban pyndonkam ïa kine ki jingshakri.
U Bah C. Kharsyntiew (ALADC) u la kren halor ka Prohibition of Child Marriage Act bad ka Protection of Children from Sexual Offences Act (POCSO Act), da kaba pynpaw ïa ki jingeh, ki aiñ bad ki jingïakynduh jingeh kiba mih na ka jingïathoh khynnah bad ki kam bymman pyrshah ïa ki khynnah.
Ka kong E. Myrthong (ALADC) ka la ai jingkren halor ka Juvenile Justice (Care and Protection of Children) Act bad ka Protection of Women from Domestic Violence Act, da kaba pynleit jingmut halor ki lad jingïada kiba don bynta ban ïada ïa ki khynnah bad ki kynthei.
Na ka liang ka kong J.Hoojon, nongmihkhmat na ka tnat Education Department, ka la batai halor ki kyndon jong ka Right of Children to Free and Compulsory Education Act (RTE Act), da kaba ban jur ba man la u khynnah u don ka hok ban ïoh ïa ka jingpule ei bad kaba long kaba kongsan.
U Bah D.Rymbai District Labour Inspector, u la kren halor ki bynta ba kongsan jong ka Child and Adolescent Labour (Prohibition and Regulation) Act, da kaba ban jur halor ka jingkhang ïa ka jingpyndonkam ïa ki khynnah ha ki kam bylla bad ka jingpynïaid ryntih ïa ka jingbylla jong ki samla ba dang rit.
Katba ka kong B.Lyngdoh Thabah na ka District Child Protection Unit (DCPU) Nongstoin, ka la kren halor ka Mission Vatsalya bad kiwei kiwei ki skhim jingïarap ïa ki khynnah kiba thmu ban ïada bad kyntiew ïa ka bha ka miat bad ka hok jong ki khynnah.
Ïa ka prokram la pynkut da ka jingïatai paidbah ha kaba ki nongwan jingïashim bynta, ki la ïoh lad ban buh jingkylli bad pynshai ïa ki jingartatien, bud sa ka jingïathuh jingïaroh na u Bah C. Kharsyntiew (ALADC).
Kane ka awareness programme ka la thmu ban pynsngewthuh ïa ki nongshong shnong jong ka Myndo halor ka hok jong ki khynnah, ki jingïada aiñ bad ka jingïoh ïa ki jingshakri aiñ ei, khnang ban pynkhlaiñ ïa ka jingïoh jingïada aiñ ha ka kyrdan shnong.
