K a jingnangjah nangjah jong ka riam tynrai katba nangmih ki sngi ka pyni ïa ka dak ba ka jaidbynriew Khasi ka la nangduk nangduk katba nang iaid ka por. Ka jingduk kam dei tang ha ka liang ka spah ka phew hynrei ka dei ha ka liang ka akor ka burom kaba phalang ha ka riam tynrai la jong. Kiwei kiba nabar kim lah satia ban ithuh ïa ki samla khasi namar ba la ibeit kum ki nongshong shnong jong ka Asia ba shathie ha ka riam ka beit jong ki. Ki samla ki lah lehse ban sngew sarong bad kham sngewhieng khmut ban ïoh riam pyrthuh ia ka riam jong ki nongwei, hynrei ka dak jong ka jinglong tynrai ka la nangjah rngai katba nangmih ki sngi. Shano kein kane kan ïalam, niuma kata ka jinglong kawei ka pyrthei ka la treikam, hynrei ka jaidbynriew ka la nangtlot bad nangduk katba nangmih ki sngi. Lah ban ong ba mynta hi ym lah shuh ban ïohi ïa ka jaidbynriew hapdeng ki samla lait noh tang ki longkmie ba la kham rangbah, wat na kine ruh la bun kiba ïa tynneng nongwei lut.
La jia aiu ia ka akor burom kaba la ïaroh eh hapoh ka ri India bad ruh hapoh ka jylla Meghalaya. Hapdeng ki ri ka pyrthei la ithuh ïa ka India kum kawei na ki ri kaba don burom kumjuh ruh ka jylla Meghalaya bad khamtam ka jaidbynriew Khasi la tip kum ka jaidbynriew tip briew tip blei. Hynrei kane rynjaiñ mynta pat ka dap tang da ki kam leh jubor khamtam eh ai ki kynthei, khynnah bad ruh ki longkmie kumjuh bad ka long kaba isaitmet ban ïohi ïa ka jingkiew stet jong kane ka kam sniew. Haba ïanujor bad kiwei pat ki jingjia ha kiwei pat ki bynta jong ka ri ne ki jylla, ym lah ban len ka jylla Meghalaya kaba dang don tang shi troh ka jingbun briew ka la roi bha ha kine ki kam sniew. Kumta ka sorkar lyngba ka tnad Pulit ka donkam bha ban thaw shisha ïa ki aiñ kiba kham khlaiñ na ka bynta ban ïada na ka jingshah thombor bein jong kiba lui lui. Hynrei ha ka juh ka por ka imlang sahlang ka dei pat ban long kaba peitngor. Ban tip khambha ïa ka jingroi palat jong kane ka kam ka long kaba donkam ban iit bniah ne sorbe ïa kiei ki daw kiba la kharoi.
Hooid ki kynthei ki sngewthuh eh ïa ka jinglong ba kyrpang bad ba laitluid jong ki ha ka imlang sahlang, hynrei lada iit ïa ka tynrai tharai kin don bun kid aw kiba long ka daw tynrai jong kine baroh. Ym lah ban len hi ruh ba ka rukom im briew man briew ha kine ki sngi katba nangstad katta ka nang synjor bad ba ka akor ka burom ruh ka nanghiar. Katba nang pyrthuh bud ïa ki nongsepngi kumta ruh ki kam sniew ki nangroi kum sha ri sepngi. Ki bor kiba peit ïa ka aiñ kum ki pulit kiba donhok ban tohkit halor ki jingjia kin lah ban batai khambha ïa kaei ka daw kaba kito ki nongleh kam sniew ki shlur ne ki brai ban leh ïa ki kam pohjait. Hato ka dei ka riam ki kynthei kaba pynbrai, ka jingpeit phlim palat, ka jingpeit ïa ki kot khlem akor, ka jingkyrni dih drok, ka jingsynjor ka jinglongshynrang, ka jinglehkput ne kiwei pat ki daw kiba ialam shaduh kane ka kam kaba ktah haduh katta katta ia ka burom ka akor.
Na ka por sha ka por ki ju mih ki jingkynthoh ba ka riam jong ki samla kynthei ka dei kawei kaba pynlong ia ka imlang sahlang ban peit sniew bad kadei kawei na ki jingkhang sha katei ka kam. Kiba riewspah ki riam bad kiew beit ha ki kali la jong ban leit ban wan. Kiba hapdeng ruh ki riam bad kiba duk eh ruh ki riam bad ki ïaid laitlan kum ki paidbah hi. Hynrei kaei kaba sngewsih ka long na kum kine ki jingmutsniew, kiba ngat pat ha ka apot ki dei kito kiba lui lui kiba ym don ki lad jingïada nangno nangno ruh. Hooid sngewtynnad ban ïohi ïa ka jingïamir jingmut jong kito kiba la nang la stad halor katei ka phang, hynrei ka don ruh kaba donkam ban shim lang ïa ka jingai jingmut jong ki longkmie kiba ieit ïa ka burom ka akor Khasi la jong. Ha kaba kut ka riam khyllah than ym tang ba ka wanrah ïa ki soh pyut, hynrei ka kdew ruh ïa ka jinglong duk jong ka jinglong tynrai ne ka snap ba paka jong ka jaidbynriew.
