Pyni ka Mawtawar ïa ka rukom treikam ban pynbiang um ba neh ha ki nongkyndong jong ka Meghalaya

Shillong, Rymphang 26 : Ka Department of Drinking Water & Sanitation (DDWS), ka Tnad Jal Shakti, ka la pynlong ïa ka bynta kaba saw jong ka ‘Sujal Gram Samvad’ mynta ka sngi, kaba pynskhem ïa ka jingkut jingmut jong ka Sorkar India ban don ka jingïashim bynta lang ban peit ïa ka kam kaba ïadei bad ka um bad ka jingpyntreikam ba ïalam da ki paidbah ïa ka Jal Jeevan Mission (JJM).
Ka jingïakren lyngba ka bor internet ka la wanrah lang ïa ki nongmihkhmat jong ka Gram Panchayat, ki dkhot jong ka Village Water and Sanitation Committee, ki nongïashim bynta ha ka imlang sahlang, ki SHG jong ki longkmie, ki samla pule bad ki nongtrei, ryngkat bad ki State Mission director jong ka JJM, ki District Collector/District Magistrate/Deputy Commissioner, ki ophisar na ka DWSM, bad ki heh ophisar na ki sorkar Jylla bad ki Union Territory.
Napdeng ki hynriew tylli ki shnong ba long ki nongbah Gram Panchayat ba la don ha kane ka bynta, ka Mawtawar ka la paw namar ba ka la pyni haduh katno lah ban pynurlong ïa ka jingpynbïang um kaba paka wat ha ki jaka kiba don jingeh ha kaba ïadei bad ka jinglong ka jaka.
Haba ai jingkren ha kane ka jingïakren, u Rangbah Shnong jong ka Mawtawar u la ban jur ba ka jingpynthikna ïa ka jingpynbiang um man ka por ha ki jaka ba kynjang bad ki jaka lum la ju khein ba ka long kaba eh haduh katta katta. Hashuwa ban pyntreikam ïa ka Jal Jeevan Mission, ki nongshong shnong, khamtam ki kynthei, ki ju pynlut por 1–3 kynta man ka sngi ban tong um na ki wah bad ki tyllong um, bunsien ki ju ieng u lain uba jrong ha ka aiom tyrkhong. Da ka jingpyntreikam ïa ka JJM, la shna ïa ki jaka pynlang um kiba kynjang khnang ban pynsuk ïa ka jingsam um katkum ka jinglong ka jaka, kaba ïarap ban pynbiang ka um kor man ka por sha man la ka iing. Ka imlang sahlang ka la ïohi ïa ki jingkylla kiba khraw ha ka jingim ba man la ka sngi, kynthup ka jingduna ka jingban khia ha ka met, ka jingtyngkai ïa ka por bad ka burom bad jingsuk kaba khraw, khamtam eh ïa ki longkmie.
Ki nongïalam shnong ki la ban jur ba ka jingpynthikna ïa ka jinglong ka um ka la kylla long ka bynta kaba kongsan jong ka jingai jingshakri. Ïa ka um la test ym duna ïa ka lai sien ha ka shisnem da ki saw ngut ki longkmie kiba la ïoh jinghikai, ki ASHA bad ki AWW. Ka VWSC ka don ka bynta kaba kongsan ha ka jingpeit ïa ka jingsam, ka jingpeit bniah ïa ka jingbha, ki campaign ai jinghikai bad ka jingpynbeit ïa ki jingeh. Ki jingeh kiba rit kum ki jingduh um la pynbeit ha ka jaka, katba ïa ki jingeh kiba kongsan la pyntip kloi sha ka PHED, kaba pyni ïa ka jinglong trai ba khlain jong ki paidbah bad ka rukom pynbiang um ha ki jaka nongkyndong kaba treikam bha.
U Ashok K.K. Meena, Secretary, DDWS ha ka jingkren jong u, u la ban jur ba katba ka JJM ka pynleit jingmut ha kaba wanrah ïa ki ljingdon jingem ba ïadei bad ka umbam umdih ha kylleng ki jaka nongkyndong jong ka India, ka bynta kaba bud kaba kongsan tam ka long ban pynthikna ïa ka jinglong ba ïaineh jong kine ki rukom treikam. Shisien ba la pynbiang ki jingdon jingem, ka jingkitkhlieh ka shong ha kaba pynthikna ïa ka jingpynbiang umdih man ka por sha ki longiing lyngba ki lad treikam bad maramot kiba khlain. Ka jingai jingshakri kaba ïaineh mynta kadei ban long ka mat ba kongsan.
U la ban jur ba ka jingpynbiang ka um ka dei ka jingkitkhlieh jong ka shnong bad u la ban jur ïa ka bynta kaba kongsan jong ki Gram Panchayat, bad ki VWSC ha kaba shim ïa ka jinglong trai ïa ki skhim. Haba ïaid shakhmat, yn kham pynleit jingmut ha kaba pynkylla ïa ki rukom pynpoi um sha ki Gram Panchayat khnang ba kin pyntreikam bad pynïaid ïa ki da ka jinglong trai ba pura. Ban kyrshan ïa kane ka jingkylla, yn pynkhlain ïa ki jaka treikam ba kynthup ïa ki District Technical Unit (DTU) ban ai ïa ki jingïarap ba donkam ha ka liang ka teknikal bad jingtreikam.
U la pyntip shuh shuh ba yn pynlong ïa ka Jal Mahotsav ha ka ri baroh kawei naduh ka 8–22 tarik u Lber, kaba sdang ha ka International Women’s Day bad kut ha ka World Water Day.
Ha ka jingkren pynkut bad ka lynti ban ïaid shakhmat, u AS & MD, NJJM, u Kamal Kishore Soan, u la ïaroh ïa ka jingpyni kaba bniah bad ai khublei ïa ki sienjam ba la sdang da ki bor Panchayat bad ki bor distrik. U la ïaroh ïa ka rukom ïashim bynta, ka jingpynïasoh lang ïa ki sienjam ai jinghikai kum ki Jal Jeevan Club, bad ka jingsdang ïa ki lad ki lynti ban pynbeit ïa ki jingeh.
U la ban jur ba ka rynsan kam dei tang ban pyni ïa ki rukom treikam kiba bha hynrei ban ïakren shai ïa ki jingeh khnang ba yn lah ban pynbeit lang bad pynbha ïa ki.