Da ka Mock Drill ban ïada na ka jingshah lyngshop mariang la pynlong ha Jowai Civil Hospital

Jowai, Rymphang 25: Ka ophis jong u Medical Superintendent (MS), Jowai Civil Hospital Ialong, West Jaiñtia Hills, ha ryngkat ka jingïatreilang bad ka ophis District Disaster Management Authority, Jowai, mynta ka sngi 25 tarik kila pynlong ïa ka jingai jinghikai bad Mock Drill, halor ki jingjia lada wan ka jingshah lyngshop mariang ha Jowai Civil Hospital.
Na ka liang ki nongmihkhmat na ka ophis jong ka Fire Service & Emergency, Police Department, Civil Defense bad District Medical & Health Officer kila wan ban don lang ha kane ka prokram.
Kum shi bynta jong ka jingai jinghikai, ka kynhun Fire Service kala pynlong ïa ka jingpyni bad jinghikai halor ka jingïada na ka ding ha hospital, kynthup ïa ka rukom pyndonkam ïa ki gas pynlip ding ne ka extinguisher bad ki rukom wad bad ai jingïarap (search and rescue) ha ka por ba ïakynduh jingjia bapher bapher. U wei na ki nongtrei ka ophis DMHO ula ai ka jingbatai kaba bniah halor ka rukom kumno ban leh ha ka por ba don kano kano ka jingjia haki jaka ba don paidbah (mass casualty management).
Ka kynhun Civil Defense ka la pyni ïa ki buit ai jingïarap kaba shngaiñ bad kaba kloi ïa kiba shah ktah. Ki heh ophisar na ka Police Department ki la batai ruh halor ka bynta jong ki pulit ha kum kine ki jingjia.
Hadien ka jingai jinghikai, la pynlong ïa ka simulated earthquake hapoh ka phyllaw hospital ban pyni ïa ki rukom trei kiba la batai, ki doctor, ki nurse, ki nongtrei hospital bad ki kynhun jingïarap kyrkieh ki la shim bynta lang ha kane ka Mock Drill.