Ladep siew lut ka Sorkar ïa ka jaka ban pynheh ïa ka Kad Liengsuiñ Shillong ha Umroi : Dy CM

Shillong, Rymphang 24 : Ka sorkar jylla ka la dep siew lut ïa ka bai jaka sha ki trai jaka bad kumjuh ruh ka la ïoh jingbit na ki bor shipai na ka bynta ban pynheh ïa ka Kad Liengsuiñ Shillong kaba ha Umroi khnang ban ïoh wan hiar ki Liengsuiñ kiba heh, ïathuh u Symbud Myntri Rangbah u Ma Sniawbhalang Dhar uba dei peit ïa ka tnad Transport, hapoh ka ïing Dorbar Thawaiñ ka jylla mynta ka sngi.
Haba jubab ïa ka cut motion ha ïing Dorbar, u Ma Sniawbha ula pyntip ba ïa mynta ka Kad Liengsuiñ Shillong kaba ha Umroi ka dang dei ka kad kaba lah ban hiar tang ki liengsuiñ ATR-72 namar ba ka runway ka jrong tang 1829 meter.
“Ka Sorkar ha ryngkat ka jingïatreilang bad ka AAI, kila pynkhreh ïa ka master plan ban nang pynheh ïa ka runway da 2400 meter, ka ban pynlah ïa ka jinghiar ki liengsuiñ ha runway 22 bad ban her na ka runway 04.
Ka jingpynheh ka donkam sa 22 acre ka jaka-11.75 acre ka jaka ki riew shimet bad 10.3 acre na ki shipai.
U Deputy Commissioner ka Ri-Bhoi, ula pyndep ïa ka jingthied jaka jong ki riew shimet ha ka 28 tarik Kyllalyngkot 2026 ha ka jinglut ba 72.17 klur tyngka kynthup ka jingsiew bailutksan bad ka jingaiti sha ka AAI ka la nang ïaid.
ïa ka jaka shipai, u Bah Sniawbha u ïathuh ba ka Ministry of Defence ka la ai ïa ka Advance Working Permission ha ka 17 tarik Iaiong 2025 hadien ka jingïabujli jaka kaba shongdor katjuh. Ka Jylla kala ithuh ïa ka jaka ba 7.7255 acre ha Shnong Umroi Madan, kaba ka jingmang antad ban thied ka long 23.55 klur tyngka “Ka jingïasoi ïa ka MoU kan sa long ha u bnai Lber 2026 bad ki shipai” ula bynrap.
Kane ka jingpynheh ïa kane ka kad liengsuiñ kan khring shuh shuh ïa ki nongwan jngohkai sha ka jylla ong u Symbud Myntri Rangbah