Nongpoh, Rymphang 24: Ki nongkhwai doh ha Ïewsier mynta ka sngi, kila lap ïa ki shyieng briew ha khap maw bala suba jur ruh ba kidei ki shyieng jong uwei u rangbah u ba la jah rngai syndon bad shah rong ha ka wah 8 bnai mynshuwa hadien ba u hap nalor ka jingkieng ha ka por ba dang shongkai bad la ki paralok, watla ym pat lah ban pynthikna pura.
Katkum ka jingtip ba la ïoh lum la ong ba nongkhwai doh hadien ba kila lap ïa kitei ki shnong ki la pyntip sha ki bahaïing hasem bad sha ki bor shnong bad mar mar naka liang ki bahaïing ki la leit pyntip noh sha ki pulit ka Nongpoh PS ban pynlong ïa ka jingtohkit kaba bñiah halor katei ka jinglap, namar la suba ba ki lah ban dei ki shyieng jong utei u rangbah uba la jah naduh u Naitung jong u snem ba la dep.
Kum ban pynkynmaw, ha ka 27 tarik u Naitung 2025, u Bah Ebi Nongshli na Umtasor u la hap na ka jingkieng ha Ïewsier ha ka por janmiet katba u dang shongkai bad ki paralok, hynrei kyndit kynsan u la hap nalor jingkieng bad la shah rong noh ha ka wah kaba heh, bad wat hadien ka jingwad khlem sangeh da ki paidbah bad ki pulit, ym shym la lapdien ïa ka met naduh katei ka sngi.
Dei mynta ka sngi la lap satang ïa ki shyieng ba la sahkut ha ki maw, hynrei ym pat lah ban pynthikna la ki dei ne em jong utei u rangbah ba jah rngai na Umtasor bad na ka liang ki bahaïing ki la kyrpad ïa ki pulit ban leh da ka DNA test khnang ban pynshisha ha kaba ki bor pulit ka Nongpoh ki dang bteng ïa ka jingtohkit bad ki la leit sha katei ka jaka ban lum bad shimti ïa kitei ki shyieng katkum ki kyndon jong ka aiñ.
