Mynjur ka kynhun myntri ïa ka Institute of Public Health Shillong (IIPHS) Bill 2026

Shillong, Rymphang 24 : Ka Kynhun Myntri ha ka sngi Ba-ar ka la mynjur ïa ka Indian Institute of Public Health Shillong (IIPHS) Bill 2026, kaba plie lad ïa katei ka jaka pule ban ïoh ïa ka kyrdan state university.
Haba pyntip ïa kane hadien ka jingïalang jong ka kynhun myntri, u Myntri ka tnad ka Koit ka Khiah ka sorkar jylla, Bah Wailadmiki Shylla u la ong, “Kane kan dei ka jaka pule kaba kyrpang na ka bynta ka thain shatei lam-mihngi jong ka ri, kan lah ban pynkhlain shuh shuh ïa ka jingdon ki nongtrei ym tang ha ka jylla hynrei na ka bynta ka thain baroh kawei.”
U la ong ba ka IIPHS kaba dei ka Public Health Institute ha baroh kawei ka thain, kan lah ban ai kyrdan degree sha ki samla pule da ka kyrdan kum ka University.
Haba kren bad ki lad pathai khubor, u Myntri u la kdew ruh ïa ki jingnoh synñiang jong katei ka jaka pule ha kaba ïadei bad ki kam wadbniah, nangta ki jingai jinghikai bad ki lad jingïarap haba ïadei bad ka koit ka khiah da kaba kdew ïa ki kam jong ka bad ïadei bad ka jingai jinghikai halor ka Cardiopulmonary Resuscitation (CPR), ka jingkyntait ban shim dawai bad kiwei kiwei.
Shuh shuh u Myntri u la ong ba kane ka jaka pule ka la long kum ka Research University lane ka skulbah ba wad bniah.