Na ka `31 klur ba ïarap ka sorkar sha Mairang ban kyntiew ïa ki kam jngohkai ïoh jingmyntoi ki trai shnong

Shillong, Rymphang 24: U Myntri kam jngohkai u Timothy D Shira ula pyntip mynta ka sngi hapoh ka ïing Dorbar Thawaiñ ba ka Sorkar ka la ïarap pisa haduh 31 klur tyngka ïa ka Mairang Constituency naduh u snem 2017, ban kyntiew ïa ki kam jngohkai ha katei ka thaiñ bad kane ka la wanrah bun ki jingmyntoi ïa ki trai shnong.
Ha ka jubab ba la wanrah ha ïing Dorbar, u Shira ula ong ba ki jingmyntoi ki kynthup ïa ka jingpynmih khajna, ka jinglah aikam aijam, ka jingkiew ka kamai ki trai shnong ba treikam khaïi bad kyrshan ïa ka kamai jakpoh ki jaka nongkyndong. Ka jingwan tuid ki nongwan jngohkai ka la ïarap ïa ki trai shnong ban kiew ka ïoh ka kot namar ka pisa ba wan tuid ka tyllun hapdeng ki trai shnong bad kane ka la kyntiew bha ïa ki shnong ki thaw wat kiba don sha kyndong kynshrot ruh.
U Myntri ula pyntip ïa ki jingtei kiba la pyntrei ha ki skhim bapher bapher ba kynthup ïa ki jingtei harud ki wah, zipline, eco-resort, cable suspension bridge nalor kiwei kiwei.
Halor ka jingpoi ki nongshangkai, u Shira u iathuh ba haduh 28,503 ngut ki nongshangkai kynthup ïa 28,487 kiba na ri bad 16 kiba nabar ri, ki la leit kai sha Mairang ha kine ki saw snem naduh u 2022 haduh 2025.