Shillong, Rymphang 24 : U Symbud Myntri Rangbah ka Jylla Bah Prestone Tynsong ula pyntip ïa ka ïing Dorbar Thaw Aiñ ba ka jingmang pisa ban tei thymmai ïa ka Tara Ghar Guest House kum ka 5 Star la hap ban pynthymmai biang na ka 15 klur tyngka sha ka 24.91 klur tyngka hadien ba ka dor jongu Contractor ka poi 12.38% palat ïa ka dor kaba la buh mynshwa.
“Uwei u Contractor ula buh ïa ka dor ba 12.38% palat ïa ka dor ba la buh. Dei na kata ka daw ba lahap ban pynthymmai ïa ka jingmang pisa” ong u Bah Prestone haba jubab ïa ka cut motion bala wanrah da u Nongïalam ka Liang Pyrshah u Dr Mukul Sangma ha Iingdorbar Thaw Aiñ.
U ïathuh ba ka pisa bynrap ba 12.89 klur kan kynthup ïa ki jingshna ïa ki tiar ki tar bad jingdon jingem ban pyndait bad buh hapoh.
U Bah Prestone ula bynrap ba ka Tara Ghar Guest House kan dei ka jingtei ba thymmai, kaba ki nongwan kai kin itynnad ïa ka la kum ka five-star hotel.
“Kan dei kawei na ki Guest House ka Jylla ba biang tam nadong hadong hapoh ka Ri bad kan dei ka sien ba nyngkong kaba ngin don ïa ka State Guest House kaba ïahap kum ka five star”.
U ïathuh ba ki Ophisar ka Sorkar Pdeng ba la shongthait bad ki briew ba wan nabar ri ki la ïaroh ïa kane ka jingtei, haba bynrap ba ka Sorkar kan thmu ban tei ha kajuh ka rukom ïa ki jingtei ki ban sa mih thymmai.
Haba u Dr Mukul u kylli la ka don ka jingpyrshang ban pynhiar ïa ka dor jingtei khnang ban tyngkai ïa ka pisa, u Bah Prestone ula kyntait ïa ka jingkam ba ka jingtei thymmai ïa ka tara Ghar ka dei kaba la pynshongdor palat, haba pynpaw ba ka Sorkar kala pyntreikam ïa ka kat kum ka dor naduh u snem 2021-22.
U ïathuh ba kane ka Guest House ka don haduh 18 tylli ki kamra kynthup hynriew tylli ki kamra VVIP.“Nga kyrpad ïa ki dkhot ba kin leit rung kai ka nam jong ka Meghalaya ka la nang kiew namar kane ka Guest House” ula bynrap.
