Shillong, Rymphang 23 : Ka Meghalaya ka la iarap ban aikam haduh 3.66 lak ngut hapdeng u snem 2019 bad 2025, haba kdew ïa ka jingkheiñ ba la leh kat kum ka KLEMS ha ryngkat ka rukom treikam ka Reserve Bank.
ïa kane la pyntip da u Myntri Rangbah ka Jylla Conrad K Sangma haba jubab ïa ka jingïatai nia halor ka jingkren lamphang u Lat ka Jylla hapoh ka Dorbar Mang tyngka mynta ka Lah Sngi U Blei.
Ka rep ka riang ka ai haduh 1.90 lak ka kam, ka floriculture (thung soh, rep syntiew) ka ai 789 tylli ki kam, ka jingthung tit-4,078 tylli ki kam, ka jingthung soh- 12,714, ka rep organic-47,927 bad ka Lakadong Mission-15,333, kaba synniang sha kane ka thup baroh lang.
“Man ki district ki la ïoh jingmyntoi” ong u Conrad haba pynpaw ba ka jingaikam ha ka rep Organic ha West Garo Hills ka la kot 5,270, Ri-Bhoi-4301, bad East Khasi Hills-4728. Ki Hotel kila aikam haduh 12,683 ngut, ka kam ñiah kali-9835 ngut bad ka kam pynmih mar bad recycling-24,926.
U Myntri Rangbah ula ïathuh ba ki skhim ka Jylla kila kyrshan ïa kumba 10,000 ngut ki briew hapoh ka YES Meghalaya, 11.050 hapoh ka Aqua Mission, 1.7 lak hapoh ka CM-CARE bad 9000 hapoh ka PRIME, kaba jan kot sha ka 8 lak ki nongïoh jingmyntoi baroh lang.“Ka long kaba eh ban pynhun ïa baroh hynrei ngi la pyrshang” ula ong.
Halor ka jingsiew bainong, u Conrad ula ong ba ka Meghalaya Minimum Wage ka long 525 tyngka ka dei ka jingsiew ba wan ba-ar hapoh ka Ri hadien jong ka Karnataka kaba long 581 tyngka bad ka dei ruh ka jingsiew kaba heh duh ka ha ka thaiñ Shatei Lam Mihngi.
“Kane ka pyni ïa ka jingthmu jong ka Sorkar ban kyrshan kat kaba don ka lad ka lynti ia ki nongshong shnong kiba duk na kiba duk tam” ula ong.
Nalor kane, u Myntri Rangbah ula ïathuh ba ka Meghalaya mynta ka dei ka Jylla ba wan ba-ar ha ka jingkiew sted ka ïoh ka kot hapoh ka Ri kaba kot haduh 9.66% ka jingkiew ka GSDP, hadien ka Tamil Naduh kaba kot 11.91 %.
“Kane ka dei ka kam kaba da sngewhun shisha ki jingpyrshang ba la leh ha kine ki phra snem ba la leit, ka la lam sha kane ka jingkiew shaphrang” ong u Conrad haba bynrap ba ka Jylla ka pynneh ïa ka jingkiew ba 10% ha kine ki lai snem.
“Ka Sorkar kala buh ia ka thong ba kot 85,000 klur tyngka ka GSDP, lane kumba $10 billion ka ïoh ka kot.
Ula kubur ba ka per-capita GSDP ka dang rit, ha kaba ka Meghalaya ka la kiew na ka kyrdan 28 ha u 2019 sha ka 26 mynta, bad kdew ïa ka jingkha roi ka jingdon paid da 0.95%.
“Ngi don ha ka kyrdan ba 5 hapoh ka ri haba phai sha ka jingkiew ka per-capital GDP ka Meghalaya hapdeng u snem 2019-2025” ula ong “Tangba ngi kham biang mynta ban ïa kaei kaba long ha u snem 2018”.
U Conrad ula pynpaw ruh ba ka kam ba nyngkong eh ba la pynïoh da ka Sorkar jong u ka dei –ka State Anthem bad ka Shap ka Jylla (symbol) hadien 50 snem, ka jingpynim ïa ki project ba la rim kum ka Crowborough Hotel bad ka ïing Dorbar Thaw Aiñ ba thymmai.
U Myntri Rangbah ula kren ruh halor ka jingtynruh ka Sorkar ïa ka kam sengkam lajong bad ka pynïoh kam kum ka PRME bad CM-Elevate, haba ban jur ba ka jingroi ka dei ban nang pynbha ïa ka jingim jong ki nongshong shnong.
Ha kajuh ka por, u Myntri Rangbah ula pynbna ba ka Sorkar kan tei ïa ki ïing na ka bynta ki longïing ba duk ki bym lah ban thied jaka, haba pynpaw ba kane ka plan ka pyni ïa ka jingthmu ban pynthikna ba “kiba duk na kiba duk tam kin nym shah ieh shadien”.
