Shillong, Rymphang 23: U Myntri Rangbah ka jylla u Conrad K. Sangma u la pynrem jur ïa kaei kaba la jia ïa lai ngut ki samla kynthei ha Nongbah Delhi kiba la shah kren beiñ ha ki ar ngut ki shi kurim kiba ïa sah wai ha kajuh ka ïing tang namar ba ki dei na Northeast.
U Myntri Rangbah u la ong ba ki bor jong ka aiñ ki dei ban leh ïa kaba donkam lane lada donkam ban ïa kren bad ki bor ki bahalor na ka liang jong u Myntri Rangbah ka Meghalaya un long u ba la kloi ban pyntikna ba kum kine ka jingkren jaitbynriew kam dei ban jia.
U la ong ba ha Ri India ki don shibun ki jait bynriew bapher bapher kumta donkam ban ïa burom mar kylliang iwei ïa iwei, kane ka jingleh jong ki ar ngut shi kurim da kaba kren ïa ki kyntien ki bym sngewtynnad ka long kaei kaei kaba ym lah ban pdiang kumta u khmih lynti ba ki bor ka aiñ kin leh ïa kaba donkam.
Ha kajuh ka por u Myntri Rangbah u kyntu ïa baroh ki paidbah nongshong shnong ka Ri India ba kum kine kiei kiei kim dei ban jia hangno hangno ruh la ka dei ha kano kano ka jaka ha ka Ri India namar baroh dei ki Nong India hap ban ïa burom mar kylliang ha ka imlang sahlang.
