Shillong, Naitung 12 : Ka tnad Horticulture jongka sorkar jylla ka la shim ïa ka sienjam ban phai khmat bad pynkhlaiñ ïa ka jingrep soh-ñiamtra (Khasi Mandarin Orange) kum shi bynta ban kyntiew ïa ka ïoh ka kot ki nongrep ha East Khasi Hills, South West Khasi Hills, South Garo Hills nalor kiwei pat ki District ka Jylla Meghalaya.
U Bah Banteidor Lyngdoh, Myntri ba dei peit ïa kane ka tnad bad u MLA ka Mawkynrew Constituency, u la buh jingtyrwa ha khmat ka North Eastern Council (NEC) ba kan bei tyngka na ka bynta kane ka jingthmu bad dang shen la mang kumba 7 klur tam ban ai jingïarap sha ki nongrep soh.
Na kane ka mang tyngka la mang 500 tynrai ki dieng soh na ka bynta iwei pa iwei i ba dei hok ban ïoh jingmyntoi.
Mynta ka sngi 12 tarik Naitung la pynlong ïa ka jingïalang ha shnong Mawlyngngot, Mawkynrew Constituency ban sam ïa ki tynrai dieng soh sha ki nongshong shnong ha katei ka thaiñ, ki la don palat 100 ngut kiba la ïoh jingmyntoi nalor ki tiar synreit dawai bad ka sboh ba khlem pyndonkam dawai.
Nalor u Bah Banteidor Lyngdoh kum u kongsan ha kane ka jingïalang ba la khot pynlong da ka tnad Horticulture la ïa donlang ruh da u Bah A Shullet, Horticulture Development Officer, u Bah KB Lakiang, DHO East Khasi Hills, u Bah Tyngkai Mynsong kynthup ki nongrep soh bad nongïoh myntoi bad kiwei kiwei pat.
U Bah Banteidor haba kren ha ka jingïalang u la ong ba kane ka dei ka jingangnud kaba la slem jong ki nongrep ban ïoh jingmyntoi bad jingïarap ha kane ka kam ban rep soh bad mynta da ka jingïatreilang la lah ban pynurlong.
“Naduh ki snem kiba la dep ki nongrep ki la angnud bad dei tad haduh ba ngan da shimti ia ka kam kum u Myntri nga la ïamir jingmut bad ki ophisar ban wadlad ban ïarap ïa ki nongrep soh-ñiamtra bad lyngba ka NEC kaba nga la buh jingtyrwa ban ïarap la lah ban pynïoh ïa kane ka mang tyngka “, u la ong.
