Shillong, Rymphang 21: Katkum ka kyrwoh khubor ba la phah la ong ba ka ophis jong u District Magistrate, West Garo Hills, Tura la pynmih ïa ka jingpynbna ha kaba la bthah ïa ki Local Area Development Committee (LADC) hapoh jong ka sor Tura ba kidei ban bud ryntih ïa ki kyndon jingbthah ha kaba ïadei bad ki nongbylla kiba wan na kiwei ki jylla ban trei bylla ha ka ban tei ïa ki jingtei bapher hapoh jong ka district jong ka thaiñ baroh kawei.
Ïa kane ka jingpynbna la pynmih da u District Magistrate u Vibhor Agarwal bad kane ka jingbthah ka long ha kaba ïadei bad ka jinglong jingman ha kane ka district ïa kaba la donkam ban pynmih da ka jingbthah ban pynsaphriang sha baroh ki nongshong shnong ha ki shnong bapher bapher jong kane ka distrik.
Katkum katei ka kyrwoh, la bthah ïa baroh ki LADC ba kin pynlong ïa ki jingïalang hapoh u pud u sam u jong ki ban batai ïa ki nongshong shnong shaphang ki jingjia kiba dang shen bad ban pynlong ïa ki prokram pynsngewthuh paidbah khamtam ha ka ban pynsngewthuh ïa ki samla halor ka jinglong jingman kaba mynta.
Ha katei ka jingbthah, la kdew shai ba ki nongbylla bad ki nongtrei kiba donsap kiba donkti ha ka ban tei ïa ki jingtei bapher bad ka jingshna ïa ki surok jong ka sorkar ne ki riew shimet ym dei satia ban pynthud ne pyndik ïa ki, namar ba kine ki projek kidei kiba la buh da ka por ban yn hap ban pyndep ïa ki katkum ka por kaba la buh.
Nalor kane, la bthah ruh ba ki nongbylla kiba wan na kiwei ki jylla kiba don bynta ha ki kam tei jingtei ba ki dei ban rejistar bad ka Labour Department ka ban ïaid bad ka Meghalaya Identification Registration (Safety and Security) of Migrant Workers Act, 2020.
Ka kyrwoh khubor ka ong ruh ba la pynkup bor ïa ki pulit ba kin leit pynshisha ïa ka jaka kaba kine ki nongbylla ki wan bad la bthah pat ïa ka Labour Department bad ïatreilang bad ki pulit ban pynthikna ban rekod thikna bad ban rejistar ïa ki nongbylla kiba la dep ban pynshisha.
