Khat-arsnem mynshuwa ngi la ïoh ïa ki pos bad sainar hynrei haduh mynta ym pat don bording

Nongstoiñ, Rymphang 19 : Ka shnong Kyrshai ka dei ka shnong kaba don ha syndah bad ka jylla Assam hynrei ka sorkar Meghalaya ka la ieh noh khunswet ïa katei ka shnong ha baroh ki liang la ka long ha ki surok, ka umbam umdih, ka bording eletrik bad kiwei kiwei ki kam pynroi ba ki paitbah ki don kam man la ka sngi. Kat kum ka jingïaid jong ka por ka bording eletrik ka dei ka ba donkam haduh katta katta na ka bynta ki paitbah nongshong shnong hynrei ki paitbah katei ka thaiñ kata ka Kyrshai Nongspung Umbah bad kiwei kiwei haduh kine ki sngi kim pat ïoh bording eletrik satia.
Ha kine ki khyndiat sngi ba la dep u nongthohkhubor u la hiar sha katei ka thaiñ ban leit peit ïa ka jinglong jingman bad la lap ba ki post bad ki sainar eletrik ki la don hynrei ka bording pat kam don satia. Ha katei ka sngi la ïoh ban ïakren bad u bah Albert Nonglang uba dei u Sordar bad u bah Probin Snar ba dei u Secretary jong katei ka shnong ha kaba u la ong ba ka MECL ka la pynpoi ïa kitei ki post bad sainar eletrik naduh u snem 2014 bad ka bording ka la poi hynrei tang hadien shibnai ka bor ding ka la duh noh bad naduh katei ka por haduh mynta ym don bording shuh.
Ubah Probin u la ong ruh ba ki don ki jaka ba ki sainar ki la hap bad ki post eletrik ruh ki la kynriang hynrei na ka liang ka ophis jong ka MECL kam tip satia. U la ong ruh ba ka jing bymdon bor ding ha kitei ki shnong ka la buh jingeh bha ïa ki khynnah skul kiba don kam ban khreh kot. Nalor kata u la ong ruh ba imat ki nongtrei jong ka MECL kim kwah ban trei ha katei ka thaiñ namar ka jingbym pat don ïa ka surok naduh Rambrai haduh Kyrshai.
Ha kajuh ka por u la ong ba ka jingbym don bording haduh kine ki sngi ka dei namar ba ka sorkar ka ñew shiliang khmat bad dei na ka jing ñiew shiliang khmat jong ka sorkar ïa ki shnong khappud ba ka Assam ka shlur ban kyntur pud da kab shna ïa ki surok kiba paka, pynpoi bording haduh ki shnong kyndong kynshrot bad kiwei kiwei ki kam pynroi ba ki paitbah ki don kam man la ka sngi.
Khatduh eh u la ong ba lada ka MECL bad ka sorkar jylla kim kheiñ ba ki paitbah ka thaiñ Kyrshai ki dei ki nong Meghalaya ka dei ban pynshai khnang ba ki paitbah shnong kin pynkhyllem noh ïa ki post bad jynrat noh ïa ki sainar ban ïoh die tiar jot na ka bynta ban thied mombati ban thang ha ka por mynmiet.