Dawa ka DS Huroi bad Lahaleiñ na ka JHADC ban pyndam ïa ka jingithuh ïa ka shnong Umpyrshin

Khliehriat Rymphang 16: Ki ar tylli ki Dorbar Shnong kiba don ha khappud bad ka ri Bangladesh ba kynthup ka dorbar shnong Huroi bad dorbar shnong Lahaleiñ East Jaiñtia Hills District ka la ai por tang ar taïew ïa ka Jaiñtia Hills Autonomous District Council (JHADC) ba ka dei ban pynuh pyndam noh ïa ka jingithuh ïa ka Umpyrshin kum ka shnong ba pura bad ong ruh ba ka Umpyrshin ka dang dei tang kum ka dong bad ka kyntoit kaba dang hap hapoh u pud u sam ka shnong Huroi.
Ha ka jingiakynduh bad u Deputy CEM jong ka Jaiñtia Hills Autonomous District Council (JHADC) ha ka 16 tarik Rymphang, ki nongialam shnong lem bad ki nongshong shnong ka Huroi bad Lahaleiñ ki la buh da ka jingthoh bad ha kajuh ka por ki la dawa ban pyndam noh ïa ka jingpynbna ne Notification kaba la pynmih myn ha ka 28 tarik Kyllalyngkot 2026 kaba la paw ban ithuh noh ïa ka Umpyrshin kum ka shnong kaba hap hapoh ka Elaka Rymbai.
Haba kren sha ki pathai khubor, u waheh shnong barim ka Huroi u bah Ham Lamurong u la ong ba ha ka jingpynbna ba la pynmih da ka JHADC, la pynkylla ïa ka dong Umpyrshin kum ka shnong bad ruh la ai sanad ïa u bah Johny Suchen ban long kum u waheh shnong ka Umpyrshin la bynrap ruh ba ha ka jingshisha ka Umpyrshin ka dei tang ka kyntoit ne dong kaba dang hap hapoh ka dorbar shnong Huroi, East Jaiñtia Hills District.
Shuh shuh haba pynshai halor kane, u bah Ham u la ong ba naduh mynshwa tang ka Shnong Huroi bad ka shnong Lahaleiñ ki dei ki shnong kiba don ha katei ka thaiñ, lait na ka Lejri bad ka Hingaria ym pat ju don ka shnong kaba kyrteng kum ka Umpyrshin “Ka jaka kaba la kam ba ka dei ka Umpyrshin, kadei ka jaka jong ka shnong Lahaleiñ kaba la ai sngewbha sha ka shnong Huroi, ki don kumba 70-73 tylli ki longiing kiba sah ha ka dong Umpyrshin haduh u snem 2026, napdeng kine ki 70-73 tylli ki longïing, 50 tylli ki longiing ki kyrshan ïa ka dorbar shnong Horoi bad pynithuh ïalade kum ki nongshong shnong ka Huroi.
U bah Ham Lamurong u la iathuh shuh shuh ba ha ki snem 1970 u (L) Ril Nongpluh uba dei u kpa jong u Johnny Suchen bad u nongshong shnong jong ka shnong Huroi u la sdang ban rep ban riang ha katei ka jaka, hynrei dei ha u snem 2000 u Johny Suchen u la kam pynban kum u waheh shnong ha katei ka jaka bad na ka liang ka Dorbar shnong Huroi kumjuh ka Elaka Rymbai ki la rai pynrem ïa u bad ha u 2004 la rai pynrem ïa u da ka ïng kashari jong ka District Council.
Ki nongialam shnong kiba na Huroi bad na Lahaleiñ kila ong ba katkum ka The Jaiñtia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act, 2015, ban seng ïa kano kano ka shnong donkam ka jingiamir jingmut na ka ophis jong u Dolloi ka Elaka Rymbai, hynrei ha kaba ïadei bad ka Umpyrshin, ka District Council kala ïaid lait ïa ka aiñ bad kam shym la bud ha kaba ym don jingai jingmut jong u Dolloi ban seng shnong ïa ka Umpyrshin.
Kumta kitei ki nongialam shnong jong ki ar shnong kila dawa ba ka council ba dei ban pyndam hapoh ar taïew ïa katei ka jingpynbna lym kumta kin iaid da ka lynti jong ka aiñ.