Shong jingïalang ka SRES-DID ban bishar bniah ïa ka jingpyntrei kam ka scheme “VB-G RAM G”

Khliehriat Rymphang 15: Halor ka jingthmu ban bishar bniah ïa ki jingpyntreikam ïa ki skim kiba wan na ka sorkar pdeng, ka State Rural Employment Society- District Implementing Division (SRES- DID), East Jaiñtia Hills District myn ha ka 13 tarik mynta u bnai rymphang ka la pynlong ïa ka jingïalang ha Conference Hall ha ophis u Deputy Commissioner, East Jaiñtia Hills District, ha Khliehriat ha kaba la wan ban ïa don lang ki heh sorkar kiba na ki tnat treikam bapher bapher kiba napoh ka district.
Halor ka jingthmu ban pynlong ïa ki jingpyntrei ïa ki kam ki jam kiba ïaid beit ïaid ryntih ka State Rural Employment Society- District Implementing Division (SRES- DID), East Jaiñtia Hills District ka la shimkhia ha ki jingpyntrei ïa ka Jan San Samvaad (Public Outreach) based IEC kiba pyntrei hapoh ka “VB-G RAM G” (Viksit Bharat Guarantee for Rozgar and Ajeevika Mission (Gramin).
Haba kren ha ka jingïalang u Deputy Commissioner, & District Programme Coordinator, SRES- DID, East Jaiñtia Hills District, u Manish Kumar, IAS u la kren shaphang ki jait skim ki ban kyntiew ïa ki paidbah na ka jingim duk, u la ong ba ki skim ki dang ïai bteng ban treikam ha jylla Meghalaya khamtam ha ki shnong ba kyndong. U la ong ruh ba ki skim ki dei kiba lah ban kynthup lang palat 200 tylli ki jait kam ban pynlong kawei kaban kyntiew ïa ki jaka ha nongkyndong, la ong ruh ba ka jylla Meghalaya ka ioh haduh T 1,500 klur tyngka man la u snem bad ka sorkar ka pyntreikam ha kaba kyntiew ïa ka ioh ka kot bad ha kaba tei ïa ki jingtei ha nongkyndong.
U Manish Kumar u la bynrap shuh shuh ba ka sorkar pdeng dang shen ka dang dep pynthymmai bad pynkylla ïa ka Mahatma Gandhi National Rural Employment Guarantee Act (MGNREGA),kaba don ki jingkylla kiba don ka jingthmu ban pynbha shuh shuh bad kawei na ki jingkylla ka dei ka jingpynkiew ïa ki sngi trei jong kito kiba ju trei ïa ka 100 sngi mynta ki ioh ban trei haduh 125 sngi bad ruh ban pynbha ïa ki jingtrei la wanrah ruh ïa ki kor ki bor ka juk mynta ban pyntreikam bad kine kin wanrah jingmyntoi ïa ki paidbah ha ki nongkyndong, u la ong ruh ba ka jingthmu ba kongsan ka long ruh ban ai jingpynshai ïa ki heh sorkar jong ki tnat bapher bapher ban pyntikna ba ki kam bad ki jingpyntrei ki ïaid beit hapoh ka district, u kyntu ïa broh ki tnat treikam bapher bapher jong ka sorkar kiba donbynta ha kaba pyntreikam ïa ki skim ba kynthup ruh ka tnat District Rural Development Agency (DRDA) ba kin don ka jingiatreilang khnang ba ki jingpyntrei ïa ki skim kin long ka jingmyntoi ïa ki paidbah nongshong shnong.
Ka District Programme Manager, SRES-DID, East Jaiñtia Hills District, ka kong Sandalin Sutnga ka la ai ka jingpynshai kaba bniah halor ka jingdonkam ka Mahatma Gandhi National Rural Employment Guarantee Act 2005 khamtam ha kaba siew bainongsngi ïa ki nongtrei kaba iarap shibun ha kaba kyntiew ïa ka ioh ka kot ïa ki briew ha ki nongkyndong bad ki jingshna bad jingtei bapher bapher kiba wanrah jingmyntoi ïa ki paidbah.
Ka kong Sandalin Sutnga ka la batai bad pynshai ruh ba kane ka “VB – G RAM G” ka don ruh ka jingthmu ha kaba ïadei bad ka jingpynpoi ïa ka um, ïa ki jingshna bapher bapher, ka thaw ïa ki lad iohkam iohjam bad kaba kyntiew ïa ka khaïi ka pateng bad ka la kdew ïa ki jingïapher hapdeng ka MGNREGA bad ka “VB G RAM G”, ka la batai bad maitphang ruh halor ka Viksit Bharat, G RAM G, Act 2025.