Nongstoiñ, Rymphang 13: U phan dieng u dei u jait jingthung u ba mih bha tang ha ki jaka kiba syaid kum ha Ri War, Bhoi, Rimen bad Muliang. Hynrei ki jaka kiba u kham bha eh ka dei ha ki thaiñ Rimen bad Muliang namar ba ki dei ki jaka dew met.
Ha ka jingjurip jong u nongthoh khubor ïa ka jinglong jingman jong ka rep ka riang ha ka thaiñ Muliang kaba kynthup ïa ki 72 tylli ki shnong, la lap ba u phan dieng u dei u mar rep u ba rim tam na pdeng ki mar rep baroh. Na ka liang ki nongrep ruh ki la pynpaw ba ka sorkar ka dei ban shimkhia bad ban ithuh noh ïa u phan dieng kum u mar rep hapoh ka Jylla.
Haba ïakren bad ki riew tymmen kiba leit buhai shnong ha katei ka thaiñ naduh ki snem 1951-52, ki la ïathuh ba ha kitei ki snem ba ki dang shu sdang ban leit buhai shnong ym pat don pynthor kba, namar ki jaka ki dang don tang ki khlaw bah kiba rben kiba dap tang da ki thri bad ki dieng bah dieng san bad ki pynthor ki dang dei ki ba sah shrah.
Ki la ïathuh ruh ba ha kitei ki snem, ki mar rep ba kongsan dei tang u riewhadem bad u phan dieng bad ka rukom rep ka long da kaba shyrti khlaw bad u phan dieng u ba ki thung ha kajuh ka lyngkha ryngkat bad u riew hadem. Ki la ïathuh ruh ba dei tad haduh ki snem 1974 shaneng, ba ki lawbah lawsan ki la sdang lut, ha kaba ki nong shong shnong ki la ïaleh katba lah ban shna ïa ki pynthor kba bad ki la sdang ban ïoh kba ïoh khaw.
Watla katta ruh, u phan dieng haduh kine ki sngi u dang dei u mar rep u ba ki paidbah ka thaiñ ki dang pynneh ban rep bad pyndonkam kum uwei na ki jingbam ba kongsan. U Bah L.Thongni uwei na ki nongshong shnong u ba ju rep bha ïa u phan dieng, u la ïathuh ba watla utei u mar rep u ïaid ïew ruh, ka dor ka mur kam da thikna.
U la ïathuh ba kiba wan thied na shnong ki thied ha ka dor phra tyngka shi kilo bad ha ki jaka kiba kham sboh ka khyndew, dang lah ban pynmih haduh 20 kilo shi tynrai.
Haba pyrshang ban lum jingtip na ki tnad ba dei peit ïa ka rep ka riang ha kaba ïadei bad utei u mar rep, la lap ba haduh mynta ka sorkar kam pat ithuh satia ïa utei u phan dieng kum u mar rep.
Na ka liang ki paidbah nongrep jong katei ka thaiñ, ki la ong ba na ka bynta ban kyntiew ïa ka rep ka riang, ka sorkar ka la dei ban phah jurip bniah ïa ka jinglong jingman jong ki jaka, ban lap kiba kum kino ki jait mar rep kiba ïadei bha ban rep ban riang, khnang ba yn lah ban kyntiew ïa ka ïoh ka kot bad ka kamai kajih jong ki nongrep, khamtam eh ïa ki nongkyndong.
