Lada ngim plie lad ïa ki khun samla, kan wanrah ka jingeh ha ka ïoh ka kot: Conrad

Williamnagar, Rymphang 13: Ka Sorkar Meghalaya ka la plie paidbah ïa ka District Emporium ha District Commerce & Industries Centre (DCIC) ha Williamnagar, kaba long kum ka sienjam ba kongsan ban pynkhlaiñ ïa ki kam seng kam lajong bad ban kyntiew ïa ki kam shna kti jong ki riewlum bad ki mar ba la pynmih hi ha East Garo Hills.
Haba kren ha ka jingïalang, u Myntri Rangbah ka jylla u Conrad K. Sangma u la pynpaw ïa ka jingdonkam ban thaw ïa ki lad kamai kiba heh na ka bynta ki samla jong ka jylla.
U la kdew ba hapdeng 50,000 bad 60,000 ngut ki samla ki rung ha ka kam ha Meghalaya man la u snem, katba ki kam sorkar kiba lait ki don tang kumba 1,200 haduh 2,000 tylli man la u snem.Khlem ki jingïarap kiba khlaiñ ha ka liang ka ïoh ka kot, u la maham, ka jingïapher ka lah ban wanrah ïa ki jingeh kaba khraw ha ka ka ïoh ka kot.
“Ki jingthmu bad ki polisi jong ngi ki dei ban weng ïa kane ka jingshisha.Lada ngim plie lad ïa ki samla, kan wanrah ïa ka jingeh ha ka ïoh ka kot, ka imlang sahlang bad ka jingshah pynbor ha ka kam sain pyrthei”, u la ong.
Shuh shuh u Conrad u la ong, Ka kamram jong ka tnad ka long ban thaw ïa ki polisi, ban pyntreikam ïa ki skhim, bad ban ai jingkyrshan ïa kiba donkam.”
U la kyntu ïa ki samla ban shim ïa ka jingmut jingpyrkhat na ka bynta ha ka seng kam seng jam, da kaba pynshlur ïa ki ban “long kiba don ka jingmut ne ka jingtip ha ka kam khaïi pateng ne seng kam lajong bad shi shim ruh ïa ka rai kut da ka jingkhein,” katba u la batai ruh ïa ki lad kamai kiba nangkiew kiba mih ha ka kam jngohkai pyrthei.
Ïa kane ka emporium la plie da u Myntri Rangbah ka Jylla Meghalaya u Conrad K. Sangma ha ka jingïadon lang u Marcuise N. Marak, Myntri ka tnad PHE, ka Soil & Water Conservation and Housing, ryngkat ki heh ophisar jong ka bor district, ki nongseng kam lajong, ki nongtrei kti, bad ki paidbah.