Nongstoiñ, Rymphang 13: Ki nongsumar ïa kiba pang ba shitom da ki dawai kynbat Khasi nylla ha ka jaitbynriew Khasi Jaiñia kam dei ka kam baba dang shu sdang shen hynrei ka dei kaba la ïalam lynti da ki longshuwa man shuwa naduh hyndai bad ka hiar pateng ter shiter haduh kine ki sngi. Ha ki snem kiba mynshuwa eh ki nongsumar pang kiba pyndon kam da ki dawai kynbat Khasi paka ki don shibun hynrei kim pat don kano kano ka kynhun ban ïatrei lang na ka bynta ban pynbha suh shuh ïa ka rukom sumar pang hynrei la kumba katto katne phew snem ki nongsumar pang da ki dawai kynbat Khasi ki la don ïa ka synjuk lane ka seng kaba la tip kum ka Synjuk Ki Nongsumar Dawai Kynbat Khasi Nylla bad katei ka synjuk ka la don da kspah ngut ki dkhot kiba dei ki nongsumar pang da ki dawai kynbat .Ha ka sngi palei jong kane ka taïew la ïoh ban leit ïakynduh ïa u bah Fillingstar John Lyngkhoi uwei na ki nongshong shnong jong ka shnong Marshan Nongrim uba don ïa ka jaka sumar ha Upper New Nongstoiñ mar pyrshah bad ka IB PWD uba dei uwei na ki nongsumar ïa kiba pang ba shitom tang da ki dawai kynbat Khasi paka.Haba ïakren bad u nongthohkhubor utei u rangbah u la ong ba u la sdang ïa katei ka kam sumar pang da ki dawai kynbat Khasi nylla naduh u snem 2008 bad u dang ïai bteng haduh mynta.
Haba kylli ha kano ka rukom u ïoh ïa ki kynbat ban shna dawai bad ki jait kynbat aïu kiba u ju shna dawai. Utei u rangbah u la ong ba ki don da ki spah jait ki kynbat kiba long ban shna dawai hynrei ki don pat ki jait kynbat kiba hap ban shna kyrpang tang katto katne ki jait kynbat katkum ki jait jing shitom ba ki briew ki don.
Utei u rangbah u l;a ong ruh ba ki don ruh shibun ki jait kynbat kiba um lah ban ïoh hynrei u shu phah wad ha ki briew bad thied na ki. Nalor kata u la ong ba ki don ki jait kynbat dawai kiba donkam bha hynrei ki im kat kum ka jing long ka jaka bad ka jingshit jingkhriat jong ka suiñ bneng.Haba kylli pat kiei ki jait jingpang kiba u kham suk ban sumar u la ong ba ki don katto katen ki jait jingshitom kum ka jing bleed snam jong ki longkmie ba armet , ki longkmie ki ba kha lor man ka por bad kiwei kiwei .Haba kylli pat ha kaba ïadei bad ka rukom wad ïa ki kynbat dawai u la ong ba ha katba nang mih ki snem ki jait kynbat kiba long dawai ki la nang duna namar ka jingjur jong ka jingpom pathar ïa ki khlaw, ka jing wiang ding pathar bad ka jingpyntwa pathar ïa ki lum namar bun ki jait kynbat kiba kordor ki don ha ha ki jaka ba long krem bad ki ranab mawsiang.
Khatduh eh utei u rangbah u la kyntu ïa ki paidbah ba kin ïa burom lem ïa ki khlaw ki btap bad ki sawdong sawkun bad ban kiar na kaba wiang ding pathar bad pynjot ïa ki khlaw khnang ba ki kynbat kiba long dawai kin ym duh jait
