Nongstoiñ, Rymphang 11 : Ka jingdon jong ka ophis Verterinary ha Aradonga ka la long ka jingmyntoi kaba khraw ïa ki paidbah nongri jingri ha katei ka thaiñ. La bun phew snem ka sorkar ka la buh ïa katei ka hospital ha katei ka jaka hynrei ha ki snem ba mynshuwa ki nongtrei kim ju poi thikna bad ka ophis ruh, ka la long kum ka ïng jah hynrei mynta la kumba lai haduh saw snem kynthih naduh ba ka sorkar ka la shimkhia ban pynbha bad tei thymmai ïa ka ophis ka jingtreikam ka la ïaid beit ïaid ryntih bha bad ki nongtrei ruh ki la poi tista bha.
Ha ka jingleit peit jong u nongthoh khubor ïa katei ka jaka sumar ïa ki jingri jingdup la ïoh ban ïakren bad ka C. K Sangma ha kaba ka la ong ba ki nongtrei kiba la don ha katei ka jaka sumar ïa ki jingri ki la don naduh u Doktor, u Chowkidar, bad kiwei kiwei ki nongtrei. Ka la ong ruh ba naduh ba u Doktor bad ki nongtrei ki la don ha katei ka jaka, ki paidbah nongri jingri ki la ïoh shibun ki jingmyntoi namar ki jingri jong ki kum ki sniang, ki syiar bad kiwei kiwei ki la lait na ki jingpang kiba ktah ïa ki.
