U ‘Dragon Fruit’ u soh ba kynrei bha ha ka thaiñ Langpih

Nongstoiñ, Rymphang 11: U soh u ba rem dor bha hapoh ka Ri India ïa u ba la tip kum u soh ‘Dragon Fruit’, u long bha man bha lada thung ïa utei u soh ha ka thaiñ Langpih bad ïa kane la lah ban pynshisha lyngba ka jinglap jong u nongthoh khubor, haba pyrshang ban tih kham bniah ïa ka kam thung soh thung pai ha kitei ki thaiñ.
Haba ïakren bad iwei na ki nongrep soh ha ka thaiñ i kong S. Swangre iwei na ki longkmie i ba shong ba sah ha katei ka thaiñ I ba ju thung ïa utei u Soh ha phyllaw ïing jong i, i la pynpaw ba kane ka long kaba shisha, namar la ïohi ruh ïa ka jingsoh rynjup kitei ki soh ha u dieng u ba don ha katei ka kper jong itei i longkmie.
Haba ïadei bad katei ka phang, na ka liang jong itei i longkmie i la ong, “Une u soh lada ki briew jong kane ka thaiñ ki nang ban minot ban thung, ka lah ban long kawei na ki lad kamai, namar une u soh u shong dor kumba 100 tyngka uwei kata lada tad eh ruh. Lada ki soh tang kumba shiphew tylli ha uwei u dieng bad haba thung 10 tylli ki tynrai katno kan long ka jingmyntoi ha ka ïoh ka kot, khamtam ha kum kane ka juk kaba hiran ha ka kamai kajih”.
I la ong shuh shuh ba utei u soh u ju soh tad ynda u lah dap kumba 3 snem tam ei ei ka karta jong u bad u soh ruh kumba 3 sien ei ei ha ka shi snem. I ne i longkmie i lah thung ïa utei u soh mynta lah kumba 5 snem ei ei bad i la ïoh kheit ruh kumba 10 sien haduh kine ki sngi. I la ong ruh ba une u jait soh u ïarap ïa ka jingpang shini, jingpang khyllai, jingpang BP bad kiwei kiwei.