Ka jingtohkit kam dei tang halor ka jingtih dewïong be-aiñ, hynrei kumno ba ïohrung laitluid ki nongbylla na ri Bangladesh ha EJHD: JNC

Shillong, Rymphang 10: Ka Jaintia National Council (JNC) halor ka jingjia ha Mynsngat-Thangsko na ka daw jong ka jingbthei ka krem dewiong ha ka step 5 tarik mynta u bnai Rymphang, kaba la kiew ka jingïap briew sha ka 30 ngut ha kaba ki don ki briew kiba dei napoh ka District bad ruh ki bar jylla, kala dawa ba ka sorkar kadei ban tohkit bniah ba kumno ki briew na Bangladesh ki ïoh ban trei ha kine ki par dewiong.
Halor ka jingduh noh ïa ki briew lajong kiba dei napoh ka Didtrict, u President ka JNC u Bah Sambormi Lyngdoh u la pynpaw ka jingsngewlem na ka bynta kiba ha ïing ha sem kiba la duh noh ïa kiba ïeit ba thoin.
Haba kren sha ki lad pathai khubor u Bah Sambormi Lyngdoh u la ong,”Kum ka seng ngi kwah ban pynpaw ba ka jingjia ha Mynangat-Thangsko ka la pynkyndit haduh katta katta ïa ka imlang sahlang.Ngim lah ban pdiang ïa kane ka jingjia ba sngewsih kum ka jingjia kaba jia ryngkat ne accident.Ka don ka jingsuba kaba jur ba kane ka dei ka jingshah thombor ha ki shnong ki thaw jong ngi, kaba ngim lah ban tip bad kaba long palat ïa ka jingmutdur” u la ong.
Shuh shuh u Bah Sambormi u la ïathuh ba katkum ka jingïathuh ki riew paidbah la ong ba kiba bun kiba trei ha ki par dewiong ha Mynsngat-Thangsko kiba bun ki dei ki Muslims na ka ri Bangladesh.
U Bah Sambormi u la ïathuh ba u wei u nongtrei na ka jaka ba jia ki jingjia u la pynpaw ba, “Donbok ba ha ka sngi ba jia ka jingbthei kaba kynthup ïa san tylli ki par dewiong, ar tylli ki par dewiong kiba don hajan kim shym la treikam.Lada kita ki ar tylli ki par dewiong ki treikam, ka jingduh ïa ki briew bad ka jingmynsaw ka lah ban long kaba kham bun.”
Ki jingjia aksiden kiba rit ki ju jia bunsien ha ki par dewiong namar ki rukom tih dewiong ki bym long katkum ka jingstad saian, hynrei kane ka jingjia ka dei kaba shyrkhei tam bad kam pat ju jia mynno mynno ruh ha ka histori jong ka jingtih dewiong ha East Jaintia Hills District.
Ngi kwah ruh ban pynpaw ka jingsngewkhia ba ki nong Bangladesh ki byrngem ban pynthut ïa ka shongsuk shongsain ha ka thain shatei lammihngi na ka por sha ka por. Kumta ka JNC ka dawa ba ka jingtohkit kam dei ban long tang halor ka jingtih dewiong beain, hynrei ka dei ban kynthup ruh ia ka jingwan rung beain jong ki khar Bangladesh sha ka East Jaintia Hills District.
Shuh shuh u Bah Sambormi u la ong,”Ngi kyntu ïa ka Sorkar Jylla ba ka dei ban leh da kaba tyngeh ïa ki briew kiba dei na kawei pat ka ri kiba shong ba sah beaiñ ha ka District, namar ngim kwah ba ka khyndew ka shyiap jong ngi kan long kum ka lad kamai jakpoh ïa ki nongwan buhai shnong beaiñ”.
Ka JNC ka kyrpad ruh ïa ka tnad pulit ba kin kem ïa kito kiba donkti, khamtam kito kiba donkti ban wanrah nongbylla be-aiñ na Bangladesh.Kum ka seng, ngi maham ïa kito kiba buh ïa ka lawei jong ki pateng ban wan jong ngi ha ka jingma tang na ka bynta ka jingmyntoi shimet jong ki.