Jowai, Naitung 11: Ka Dorbar Lyiur jong ka Jaiñtia Hills Autonomous District Council (JHADC) kala poi noh sha kaba kut mynta hi ka sngi 11 tarik u Naitung, ïa ka dorbar la pynïaid da u shongknor (Chairman) Dr. Sankey Shangpung.
La sdang ïa ka Dorbar da kaba ïashim bynta lang ha ka jingkren sngewlem ïa u (L) Sing Mulieh uba la khlad noh na sla kane ka pyrthei, kiba kynthup naduh u Chief Executive Member ma Thombor Shiwat, u Chairman, ki MDC u ma Andrew shullai, ma Lakhon Dkhar, ma Brightstar Chyrmang, ma Winning Garland Sungoh, ma Phasmon Dkhar, ma J. Treilang Suchiang bad ma Otomewot Lamin (Nominated MDC). Hadien kane la don ka sngap jar ba shi minit kum ka dak ban sngewlem.
Baroh kitei ki MDC kila pynsngew shaphang ki kam jong u ma Sing Mulieh kiba ula dep ban synñniang naduh ki por ba ula rung sha ka kam saiñ hima sima ha ka snem 1978, ula long ruh u MDC haduh saw (term) bad ula long teng u CEM, EM, Nominated MDC, u Ex President jong ki MDC bad kumjuh ruh u MLA ka Jowai Constituency.
La pynsngew haka por ba u long kum u MDC ula leh shibun ki kam ba bha ban kyntiew ïa ka District Council hi baroh kawei, ula long u nongprad lynti ïa ki kam ba bha jong ka Council bad u nongai jingmut ha kiba bun ki liang.
Ha kane ka Dorbar Lyiur na ka liang u CEM ula wan rah ruh ïa ka report ba la kyntiew kyrdan ophisar ïa ki 4 ngut ki nongtrei ka JHADC, ha kane ka sngi la pdiang ruh ïa u ma Holando Lamin kum u Vice Chairman Land Revenue & Land Reform Committee JHADC ka ban treikam naduh ka 1.6.2022.
Ha kane ka Dorbar la wanrah ruh ïa ka report ba la thung Dolloi pura ïa ki ar ngut hadien ka jingjop jong ki, kata ïa u Dolloi ka Elaka Shangpung u Chanki Lyngdoh bad u Dolloi ka Elaka Nartiang u Slong Lamare ïa kine ki Dolloi la pdiang ïa ki katkum ka kyndon 5 bad 6 jong ka Jaiñtia Hills Autonomous Distrit Council (Establishment of Elaka and Village and Election, Appointment, Power, Functions and Jurisdiction of Dolloi/Sirdar and Waheh Shnong.
Ka ïing Dorbar JHADC kala wanrah ruh ïa ka report jong ka Comptroller and Auditor General of India na ka bynta u snem 2009-2010 kaba la pynkreh ban aiti sha u lat ka jylla katkum ka paragraph 7 (4) jong ka riti shynshat jong ka ri india.
