Rai ka Executive Dorbar Elaka Nongpoh bad nongïalam Raid ban register jaka bad jied Rangbah Shnong

Nongpoh, Rymphang 06: Ka Executive Dorbar jong ka Elaka Nongpoh Sirdarship ba kynthup ïa ki 7 tylli ki Raid kaba la long mynta ka sngi ha ïing Dorbar Pahamsyiem, Nongpoh, ka la shim ïa shibun ki rai ba kongsan kum ki sienjam ban khanglad ïa ki kynrum kynram bad huri hura, khamtam eh haba ïadei bad ki kam khyndew kam shyiap, bad ruh ban pynneh ïa ka bha ka miat ha baroh ki shnong hapoh ka Elaka.
Ha kane ka jingïalang la wan ruh ban shim bynta da ki nongïalam raid jong ki 7 tylli ki Raid kiba hap hapoh ka Elaka Nongpoh Sirdarship ba kynthup ïa ka Raid Nongkharai, Nongkhyllem, Nongpoh, Nongkhrah, Nonglyngdoh, Sohkwai bad Raid Nongkyrla.
Haba kren sha ki lad pathai khubor hadien ka jingïalang, u Bah Luistar Lyngdoh, Acting Sirdar ka Elaka Nongpoh Sirdarship, u la ong ba ka Executive Dorbar ka la shim ïa ka rai kaba kongsan bha kum ha ka jingregister ïa ki jaka puta sha ki ophis sorkar. La rai ba naduh mynta shakhmat, kino kino ki briew kiba thmu ban register ïa ki jaka jong ki na bynta ban pynshisha ïa ka jinglongtrai, kin hap ban ïoh shwa ïa ka jingpynshisha na ka Dorbar Shnong, Dorbar Raid bad ruh na ka ophis jong ka Elaka Nongpoh Sirdarship.
U la ïathuh ruh ba kane ka sienjam ka la mih hadien ba la lap ba ha ki katto katne ki khep, ïa kawei ka jaka la register ha ki ar tylli ki kyrteng, kaba la pynmih ïa ki kynrum kynram bad ka huri hura. Namarkata, la rai ba ki nongïalam shnong, ki nongïalam Raid bad ka Elaka Sirdarship kin hap ban leit sorjamin shwa ïa ki jaka puta, ban pynthikna ïa ka jinglongtrai, khnang ba yn lah ban lait na ki jingïakajia hadien habud.
Shuh shuh u Bah Luistar Lyngdoh u la ong ba la ïakren ruh halor ki kam jied Rangbah Shnong ha baroh ki shnong kiba hap hapoh ka Elaka Nongpoh Sirdarship. Ha kane ka bynta, la rai ba kino kino ki shnong kiba thmu ban jied thymmai ïa ki nongïalam shnong, kin hap ban pyntip shwa sha ka Dorbar Raid, bad ka Dorbar Raid pat kan pyntip sha ka Elaka Nongpoh Sirdarship, khnang ba yn lah ban pynïaid shakhmat ïa ka kam jied Rangbah Shnong ban nym mih kino kino ki kynrum kynram ha ka por jied.
Ha kaba kut, lyngba kane ka Executive Dorbar, la kyrpad ïa baroh ki nongïalam shnong ban ai ïa ka jingïatreilang kaba pura bad ki Dorbar Raid bad ka Elaka Nongpoh Sirdarship, khnang ba lyngba ka jingïasnohkti bad jingïatreilang hapdeng ki Dorbar Shnong, Dorbar Raid bad ka Elaka, yn lah ban pynneh bad wanrah ïa ka bha ka miat ha ki shnong ki thaw bad ha ka Elaka Nongpoh Sirdarship hi baroh kawei.