Ka BJP ka ïoh jingkyrshan manla ka sngi, ngi la pynkhreh ïa ka elekshon 2028, ong ki nongïalam

Nongpoh, Rymphang 06: Da ka jingthmu ban pynkhlaiñ shuh shuh ïa ka party na ka bynta ka elekshon 2028 ha Meghalaya, ka BJP Ri-Bhoi District mynta ka sngi ka la sdang ïa la ka jong ka ophis thymmai ha Nongpoh, kaban long kum ka shlem treikam jong ka party ban saiñdur bad ban pynjanai ïa ka rukom trei kam ha ka district.
Ïa kane ka ophis la plie paidbah da u State President ka BJP, u Rikman G. Momin, ha ka jingdonlang u State General Secretary u Bah Wankitbok Pohshna, ka State Secretary ka BJP ka Daniela Nonglait, u District President ka BJP Ri-Bhoi u Bah Sen Thabah, ki Mandal President na ki Constituency bapher bapher lem bad bun ngut ki nongtrei ka party.
La ong ba kane ka ophis kam dei tang na ka bynta ka District BJP Ri-Bhoi hynrei kan shakri ruh kum ka ophis paidbah jong baroh ki BJP Mandal kiba don ha ka district, khnang ban pynsuk ïa ka jingïatreilang bad ka jingïaid jong ki kam paidbah.
Haba kren ha kane ka sngi, u State President u Rikman G. Coming bad u State General Secretary u Bah Wankitbok Pohshna ki la pynpaw ïa ka jingkmen kaba khraw halor ka jingsdang ïa kane ka ophis, da kaba ong ba kane kan long ka nongrim ban pynkhlaiñ ïa ka party.
Ki la ong ruh ba ka BJP ha Ri-Bhoi ka dang ïoh ïa ka jingkyrshan naki paidbah man ka sngi, lyngba ka jingtrei shitom jong ki nongïalam bad ki nongtrei ka party. Ki khmih lynti ba ka party kan dang lah ban ïoh ïa ka jingkyrshan na ki paidbah khnang ban wanrah ïa ka jingkylla bad ki kam pynroi ha ka district, hapoh ka jingïalam jong u Myntri Rangbah duh u Ri, u Narendra Modi.
Shuh shuh la pynpaw ba kane ka dei ka dak jong ka jingpynkhreh ka BJP ha Ri-Bhoi, ha kaba ka party ka la rai ban pynïeng kyrtong ha baroh 5 tylli ki Constituency ha Ri-Bhoi District ha ka elekshon 2028, bad ka jingïaroh ka long ba ka district kan sa pynmih ïa ki MLA ka BJP na bynta ban trei hok ïa ki kam pynroi na ka bynta ki paidbah ka Ri-Bhoi.