‘Ym don kaei kaei kaba lah ban pynkylla tang hapoh shi miet’, ong u Conrad ha ba plie ïa ka RBSM

Shillong, Rymphang 3: Ka tnat Commerce and Industries jong ka sorkar Meghalaya ryngkat ka jingiatreilang bad ka Federation of Indian Export Organizations (FIEO), ka la pynlong ïa ka Reverse Buyer-Seller Meet (RBSM) 2026 mynta ka sngi ha State Convention Centre, Shillong, hapoh ka Raising & Accelerating MSME Performance (RAMP) Scheme jong ka Ministry of Micro, Small and Medium Enterprises (MoMSME), sorkar India.
Kane ka jingthmu ka thmu ban pynkhlaiñ ïa ki lad khaïi pateng mar shabar ri bad ban pynbha ïa ka jingïoh rung sha ki ïew ka pyrthei na ka bynta ki MSME na Meghalaya.
Ha kane ka ba plie ïa ka Reverse Buyer-Seller Meet la don lang u Myntri Rangbah ka jylla u Conrad K. Sangma, u Symbut Myntri Rangbah ka Jylla uba dei ruh u Myntri ba dei peit ïa ka tnad Commerce & Industries u Bah Sniawbhalang Dhar, u Chief Secretary ka jylla u Dr. Shakil P. Ahammed, ki heh ophisar sorkar; ki nongmih khmat na ka FIEO, ki nongthied nabar ri na ki khat hynriew tylli ki ri, bad ki MSME jong ka thain.
Haba ai jingkren, u Myntri Rangbah ka Jylla Conrad K. Sangma, u la ai khublei ïa ka tnad khaii pateng bad ki nongïashim bynta baroh kiba la pynlong ïa ka Reverse Buyer-Seller Meet, da kaba kdew ba ka dei ka jingïalang kaba nyngkong eh kaba kum kane ym tang na ka bynta ka jylla Meghalaya hynrei na ka bynta ka thaiñ shatei lammihngi baroh kawei.
Haba ïasam ïa kawei ka jingïathuh khana ban pynpaw ïa ka jingdonkam jong ka jingïohi, u la pynpaw ba ka lad bunsien ka don ha ka jaka ba la sngewthuh nyngkong ïa ki jingduna, da kaba bynrap ba “kam dei shaphang kaei kaba ngi ïohi, hynrei kumno ngi jied ban ïohi ïa ka.”
U la ban jur ba ki jingthmu kum ka RBSM ki dei ban wanrah ïa ki jingmih kiba lah ban ïohi.Haba pdiang ïa ki jingeh kiba ka Jylla kaba rit ka iakynduh, u Myntri Rangbah u la pynpaw ïa ka jingdonkam jong ka jingpyrshang kaba neh bad ka jinglong kaba beit.
Haba ïadei bad ka Meghalaya Livelihoods and Access to Markets Programme ba la kyrshan da ka IFAD, u la pynkynmaw ba ïa kane ka projek shisien la ai jingmut ban khang noh namar ka jingbym treikam bha hynrei naduh katei ka por la ithuh ïa ka ha ka pyrthei kum kawei na ki projek ba bha tam jong ka IFAD.
“Ym don kaei kaei kaba lah ban pynkylla tang shi miet,” u la ong, da kaba pynpaw ba ka jingkylla ka donkam ïa ka jingaiti lut, ka jingpynleit jingmut, bad ka jingïohi jngai kaba shai.
U la ong ba ka Meghalaya ka la shim ïa ki jingkylla kiba kongsan ban kyrshan ia ka mariang, kynthup ïa ka jingweng noh ïa palat 400 tylli ki kyndon, haduh 70 tylli na ki ha ka liang ki nongtrei, bad ka jingpynrung ïa ka lynti jong ki nongbei tyngka ba ïatylli na ka bynta ka clearances.
Ha kane ka sngi, u Myntri Rangbah ka Jylla ula pyllait paidbah ruh ïa ka MeghaRise Logo & Brand bad ïa ka MSME Portal ban pynkhlaiñ ïa ka branding, ban pynbha ïa ka jingïohi, bad ban pynsuk ïa ka jingïoh ïa ki digital services na ka bynta ki nongseng kam seng jam ha kylleng ka Jylla.
U Symbud Myntri Rangbah ka Jylla ba dei peit ïa ka tnad Commerce & Industries, u Bah Sniawbhalang Dhar, u la pynpaw ka jingsngewnguh ïa ki nongseng kam seng jam bad ki nongshim bynta na ka thaiñ bad u la batai ïa kane ka jingïalang kum “ka jingïalang kaba don ha ka histori.”
U la pynpaw ba ka Reverse Buyer-Seller Meet ka long “kaba pher ha ka nongrim na ki jingpyni ne ki jingïalang khaii pateng,” namar la shna ïa ka kum ka rynsan kaba pynleit jingmut ha ki nongthied kaba pynleit jingmut ha ka jingïadei kaba la buh ryntih hapdeng ki kam.
Kane ka jingïalang kaba ar sngi kan bteng haduh ka 4 tarik u Rymphang ryngkat ki jingïalang B2B ba la buh ryntih hapdeng ki nongthied nabar ri bad ki MSME na Meghalaya.