Nongstoiñ, K’lyngkot 30: Ki paidbah Khasi bad Garo kiba shong ba sah ha ki shnong khappud kiba hap ha ka Langpih sector, ki la shu sah ha ka umdum bad ka jinglyngngoh halor ka jingpynsahteng jong ki Regional Committee on Border Distpute ban leit jurip ïa ki jaka ki puta bad ki shnong ki thaw ha shuwa ban sdang ?a ka jing?apynbeit.
U Bah L.J. Nongteiñ bad kiwei kiwei ki riew rangbah jong ka thaiñ haba ïakren bad u nongthoh khubor, ki la ong ba saw snem mynshuwa kitei ki Regional Committee ki la dep ban pynbeit ïa ka Hahim sector bad ha shuwa ka Election MLA jong u snem 2023, ki la kular ba hadien ba la kut ka Election kin sa pyndep noh ban jurip ïa ka Langpih sector. Hynrei ki khlem lah ban pyndep da kaba ai daw ba kim pat ïohlad ban ïakren bad ki nongïalam jong ka Regional Committee jong ka Assam.
Ki la ong ruh ba ki sngewthuh ba ka don ka jingeh lada ka Regional Committee jong ka Assam, ka la shu thok ïa ki nongïalam jong ka Regional Committee jong ka sorkar Meghalaya, namar ba ka don ka jingthum barieh sha lyndet.
Ki la ong ruh ba kim lah ban len ïa ka jingshisha namar ki dak ki shin ki paw lyngba ki kam ba ka sorkar Assam ka leh ha ki jaka khappud, kiba dang don hapdeng ka jingïakajia, da kaba pynkheiñ im im peit peit ïa ka jingïakut ba katba ym pat lah ban ïa pynbeit ka Assam bad Meghalaya, kim dei ban pyntrei ïa kino kino ki kam pynroi ha kitei ki jaka kum ki surok, ki skul, ki madan bad kiwei kiwei.
Kumba long mynta ka sorkar Assam ka la dep ban pyntrei ïa ka surok na Kamphaduli kaba kiew sha ki thaiñ Langpih ïa kaba ym lah ban tip ba ka thmu ban pynpoi shaei ïa katei ka surok.
Kawei pat ka kam kaba ka sorkar Assam ka la leh ka dei ka jingshna ïa ka jingkieng ha ka Kyrshai lyngba ka Wah Rambrai, kaba dei ruh ka bhah jong ka sorkar Meghalaya, namar ka dei ka bynta jong ka surok two lane Nongstoiñ Rambrai Kyrshai.
Ki la ong ruh ba katkum ka jingïakut ba lada ka sorkar Assam ne ka sorkar Meghalaya, kin pyntrei ïa kino kino ki kam pynroi ha ki jaka bym pat ïa pynbeit, ki dei ban pyntip lang lyngba ki Deputy Commissioner jong ki district, kata ka Assam ka dei ban pyntip ha u Deputy Commissioner ka West Khasi Hills bad Deputy Commissioner ka West Khasi Hills sha u Deputy Commissioner ka Kamrup district.
Hynrei, ki la ong ba ha ka por jong u Deputy Commissioner barim ka West Khasi Hills, ki la leit ban kylli ha kaba ïadei bad ka jingshna ïa ka surok ha Kamphaduli bad ka jingshna ïa ka jingkieng ha Wah Rambrai, u Deputy Commissioner ka West Khasi Hills u la jubab ba um shym la ïoh jingtip ei ei.
Katei jingpyntrei ka sorkar Assam ïa ki kam pynroi ka pyni shai, ba ka dei ka jingleh khnang jong ka Regional Committee jong ka Assam, ban buh por na ka bynta leit jurip ïa ki jaka bad ki shnong kiba hap ha ka Langpih sector, khnang ba ynda la dep ban shna surok bad jingkieng ka sorkar Assam kan sa kam ba kitei ki jaka kiba ka la dep shna surok in dei ki jong ka.
Shuh shuh ki la ong ba na ka bynta ka jingkieng ha ka Wah Rambrai ha Kyrshai, u Syiem ka hima Rambrai u la dei ban tip ha shuwa ba kan sdang, namar ka dei ka jaka kaba hap ha u pud u sam jong ka hima jong u bad ka sorkar Assam ka la dei ban pan jingbit na u Syiem bad lada dei ba ka la pan jingbit balei pat u Syiem Rambrai u shah.
Kitei ki rangbah ki la ong ba ka sorkar ka la dei ban ai jingbthah ïa u Chairman ka Regional Committee on Border Dispute, ba un kyntu ïa ki nongïalam jong ka Regional Committee jong ka Assam, ba kin pynkloi noh katba lah namar ka sorkar Assam ka dang ïai bteng ban pyntrei ïa ki kam pynroi ha ki jaka ki bym pat ïa pynbeit.
