Shillong, Naitung, 10: U MLA jong ka North Shillong Constituency u Bah Adelbert Nongrum ha ka sngi u Blei u la ai jingmut ïa ka tnat Sam Bording ka Sorkar Jylla ban pynkylla noh ïa ka por pynlip bording ha ka jylla baroh kawei da kaba pynpaw ba ka jingpynlip bording ha ka por shiteng synñia haduh mynstep ka long pynban kum ka kabu ïa ki nongleh kam sniew bad ka buh ïa ki longiing longsem ha ki shnong ki thaw ha ka jingbym shngaiñ.
“Nga kwah ban ai jingmut ïa u Myntri ka tnat Sam Bording halor ka por pynlip bording tang ha nongbah Shillong ba ka la long shisha ka jingeh ïa ki nongshong shnong ha ki shnong ki thaw kaba ngi ladep mad na ka por sha ka por,” ong u Bah Adelbert ha u kyrwoh ba la phah sha ki lad pathai khubor.
“Ngi ladep mad ïa ki jingeh ha kiba bun ki liang bad baroh ka dei ka jingtlot jong ka Sorkar Jylla namarba kam don jingkitkhlieh kumno ban weng ïa kine ki jingeh kiba bun watla ngi la ïaid lynta ha ka jingïoh ïa la ka jong ka jylla la 50 snem kynthih,” u la ong.
Katkum ka jingai jingmut jong u Bah Adelbert ïa ka tnat Sam Bording ka Sorkar Jylla ka long ban ym pynlip shuh ïa ka bording naduh ka por 1:00 baje haduh 5:00 baje mynstep namarba ha kine ki kynta kan kylla long pynban ka kabu ïa ki nonglehkam sniew bad ka buh ruh ha ka jingsyer ïa ki nongleit nongwan khamtam haba don ki jingjia kyrkieh ha ka pang ka shitom bad ka buh ruh ïa ka jingbym shngaiñ ïa ki nongshong shnong ha ki shnong ki thaw.
“Donkam ban pynbeit kyrkieh thymmai da kaba pynlip ïa ka bording naduh ka por 4:00 baje haduh 7: baje mynstep bad ha ka por 12 baje mynsngi haduh 1:00 baje nohphai sngi. Nga sngew ba kane kan long ka lynti kaba kham pynbiang ïa ka jingshakri bad ka jingdonkam kaba mar kumjuh ban ïa biang lang kumba ka Sorkar ka dei ka jong u paidbah, lyngba u paidbah bad na ka bynta u paidbah,” u la ong.
