Shillong, Naitung, 10: Ka Federation of All Meghalaya Adhoc Secondary Teacher’s Association (FAMASTA) ka la pynpaw ba kan dang ïai bteng ban buddien na ka Sorkar Jylla ha kaba ïadei bad ka jingdawa ban kyntiew Deficit Pattern ïa ki skul Adhoc hapoh ka jylla Meghalaya.
“Ka Executive Meeting jong ka Federation kaba la long ha ka 7 tarik mynta u bnai ka la ïathir sani halor ka jingpynbna jong ka Sorkar ban pynkiew ïa ka Grant-in-Aid sha ki nonghikai Secondary Adhoc da kaba pynpaw ïa ka jingbym hun halor kane ka rai jong ka Sorkar namarba katkum ka jingtyrwa ba la phah sha ka tnat Pule Puthi ka long 50%,” ong u kyrwoh ba la phah da ka President ka FAMASTA ka Kong B. Kharumnuid.
“Ka Federation ka pdiang bad ka sngewnguh ïa ka Sorkar bad ïa ka tnat Pule Puthi (halor ka jingpynkiew ïa ka tulop ki nonghikai skul Secondary),” ong u kyrwoh bad bynrap, “hynrei ka Federation kan dang ïai bteng ban dawa ban kyntiew kyrdan Deficit Pattern kaba long ka jingdawa kaba la sahteng naduh u snem 2006.”
