Shillong, Naitung, 10: Ki Pulit jong ka Anti-Narcotics Task Force (ANTF) West Garo Hills ki la ïoh kem arngut ki snar khaïi drok najan ka iew Tura ha ka step Sngi U Blei. Na ka met jong kine ki arngut, ki Pulit ki la ïoh kurup 8.19 gram u drok.
Ïa kine ki arngut la ithuh kyrteng kum u Cherak R. Marak bad u Tengsuang S. Sangma kiba shong basah ha ka dong Gongadamal, Tura, West Garo Hills bad Balsri Ading, Williamnagar jong ka East Garo Hills.
Ki Pulit ki ïohkem ïa kine ki arngut katba ki dang shong da kawei ka kali kaba don ïa u nombar ML08 G 6541. Ha ka jingkhynra ïa ka kali ki pulit ka ANTF ki la ïoh kurup ïa u drok, arngut ki mobile phone, ka pisa kaba T.14,230 hajar bad kiwei kiwei de ki tiar.
Ha ka jingtohkit, kine ki arngut ki la phla ba ïa u drok la aiti da uwei u briew uba la tip kyrteng kum u Bryan Nongmor, uba sah ha Laitkor Rngi, Sohiong, East Khasi Hills.
Mar mar ki Pulit jong ka Tura ki la pyntip sha ki Pulit ka nongbah Shillong bad ha ka jingleit khynra ïa ka ingsah jong Nongmor, ki Pulit ki la ïohi kurup kumba 4.43 gram u drok, kawei ka mobile phone bad kiwei kiwei ki tiar.
