Naduh ba duh shuki Myntri u Bah AL Hek i kumba u la biej ; dei ban beh seng shipor – BJP South Shillong

Shillong, Naitung 10: Hadien ba ka la don ka jingïather bad ka jingkawang ktieh ki MLA ka BJP u Bah AL Hek MLA na Pynthorumkhrah bad u Bah Sanbor Shullai MLA na South Shillong, mynta pat sa ka BJP South Shillong ka dawa dawa beh seng shipor ïa u bah AL Hek.
Kane ka thma ktien jong kine ki MLA ka BJP ka long hadien ba u Bah AL Hek u la pynrem jur ïa u Bah Sanbor Shullai halor ka jingknieh ktien bad ïeng kynsan jong u ha ka por ba u Bah Metbah Lyngdoh uba dei u Lamphang ka Ïingdorbar thaw aiñ ka jylla ha ka 6 tarik Naitung ha jingïalang wan pan jingkyrshan ka Draupadi Murmu ka kyrtong ban ïakhun ïa ka shuki President ba la pynieng da ka NDA.
Ka BJP South Shillong ka la kynnoh ba ka kane ka jingbna paidbah ïa kaei kaba la jia ha kato ka sngi ka dei namar ka jimgkwah thad u Bah AL Hek ïa kaei kaba u Bah Sanbor u leh. Ka BJP South Shillong ka la ong ruh ba kane ka jingleh jong u Bah Hek ka pynpaw pyrthei ïa ki buit sïanti ba arsap jong u ban phiah ïa ka jingïatylli ha ka sorkar MDA bad ka kynhun NEDA kaba la ïalam da ka BJP kaba ka UDP ruh ka long dkhot. Ka BJP ka la ong ruh lehse u Bah AL Hek u leh khnang ïa kane ban pynïohnong ïa ka TMC namar udei uba ïa ieid ïathoiñ bha bad u Dr Mukul
Ka BJP South Shillong ka la ong ba u Bah Sanbor Shullai u la knieh ktien ïa u Bah Metbah ka dei namar ba u Bah Sanbor ieng ha ka nongrim jong ka BJP ban ym don jingshah shiliang ïa kino kino ki jait niam ha ka ri.
“Naduh ba u Bah AL Hek u la shah pynhiar shuki kum u Myntri i kumba u la biej khlem tip shuh shaei ban leit ban kaei ban leh”ong shuh shuh ka BJP South Shillong.
Shuh shuh ki dawa ba dei ban ai jingpynshitom kaba tyngeh ïa kane ka jingleh pyrshah party jong u Bah AL Hek da kaba beh seng shipor tad haduh ba ka BJP na Delhi kan pynmih da kiwei ki hukum. Ka BJP South Shillong ka la ong ruh ba u kane ka jingleh u Hek ka dei namar ka jingkhwan myntoi jong u shimet khlem salia ban ïapeiñ ïa ka bha ka miat ka jylla bad ka ri.a