Shillong, Naitung 10: Hadien ba ka sorkar India ka la pynmih ïa ka hukum ban khang shisyndon ïa ka jingpyndonkam ïa ki plastik ba tang shi sien pyndonkam ne Single Use Plastic ha ki bynta ka East Khasi Hills u nonglum khubor jong u Mawphor u la ïoh ban ïakren bad ki nongshong ïew ha Ïewduh ban sngewthuh kaei kaba ki don ban ong halor kane ka sienjam ka sorkar.
Ha kane ka jingleit u Mawphor da lade la shem ba ki katto katne tylli ki dukan die jhur bad kiwei ki mar ki la sdang ban pyndonkam da kaba song ïa u jhur ha ka sla bad ki la sdang bun ruh kiba wan siew wan tda ki la wan rah ïa la ki pla jaiñ.
Kiba bun na ki nongshong ïew ki pynpaw ba ka don ka jingartatien ïa kane ka jingleh ka sorkar ïoh ha ka dei tang ka drama pynkulmar paidbah namar la bun bun sien ki la ju pynmih ïa kane ka hukum.
Shuh shuh ki don katto katne ki nongshong ïew ki la ïathuh ba na ka liang jong ki ki kyrshan pura ïa kane ka sienjam kaba ka sorkar ka leh namar ki ong ba kan pynduna shibun ïa ka jingjakhlia ka mariang. Don ruh ki katto katne kiba ong ba lada ka sorkar ka kwah ban khang plastik ka dei ban khang beit ïa ki karkhana pynmih plastik tang katta hi ym donkam wan jurip shuh ha ïew ki la pynpaw.
“Leit sha ïew, sha lum ne ki jaka jngohkai pyrthei peit la ka jingjakhlia ka dei na ki plastik ba song jingsong na ïew ne na ki chip ki biskit, ki klong um bad ki klat plastik” pynpaw kiba bun
“Lada ka sorkar ka mut shisha ban pynduh plastik khang syndon sbak ïa ki kompeni pynmih chip ban song ha ka song kaba ki song mynta hynrei lada ïa ngi ka ong ym long pyndonkam plastik katba ïa ki kompeni heh ka shah beit kane ka la noh shiliang” ong ka sur ki nongïew.
Haba pyrshang ban leit leit ïakren bad ki nongdie doh bad dohkha ki la pynsngew ïa ka jingkut lad ba ki shem jingeh ban pyndonkam da ka sla ban song ïa ka mar. Ki la ong ba lada yn khang noh ïa ka jingpyndonkam ïa ka plastik kan buh jingeh ïa ki ban song doh bad dohkha namar ki dei ki mar jaw um bad khamtam lada ki paidbah ki thied ïa ki doh jem doh snam. Ki katto katne tylli ki dukan die doh bad dohkha ki la kyntu ïa ki paidbah ba kin wanrah noh da ki tiffin lane ki jingbuh. Shuh shuh ki la kdew ba lada ka sorkar ka thmu shisha ban pynduh jait ïa ka jingpyndonkam ïa ka plastic ka dei ban thaw lad da kumwei pat ban wanrah bujli ïa ka song ha ka jaka jong ka plastic.
Haba pyrshang pat ban kylli la kine ki Organic Plastik bad ki plastik kiba tam ïa ka 50 Micron kin lah ne em ban mih bujli kiba bun na ki nongshong die jingdie ki ïathuh, kumba long mynta ka jingeh ka long namar kine ki plastik ki dang duna ha ïew bad ka jingrem ka dor jong ki nalor ka jingkhia pynpaw ki nongïew.
Ki katto katne ngut ki nongwan thied nongpet kiba la ong ba ki sngew ïadei ïa ka jingkhang jong ka sorkar ïa ka plastik hynrei ki la pynpaw pat ïa ka jingeh namar ki don ki marbam ki bym lah ban song tang ha ka sla, da kawei ka sur ki la pynsngew ba lada yn khang ïa ka plastik, ka sorkar ka dei ban wanrah pat da kiwei ki jait jingsong kiba long bujli ïa ka plastik.
“Lada ngi kwah ban khang ïa ka plastik ka lah beit lada don mon” pynpaw iwei i nongwan siew ha Ïewduh
