Nongstoiñ K’lyngkot 29: Na ka bynta ban kyntiew shuh shuh ïa ka pule puthi bad ban ai ka jingshakri ba kynsai sha ki para mynsiem ba kordor kiba shong ba sah ha ki shnong kiba don ha khappud bad ka Assam, ka Khasi Jaiñtia Presbyterian Synod Sepngi hadien ba ka la dep ban shimti ïa ka Tynghor Presbytery English School ba ka la seng ha ka shnong Langpih ka la shimkhia kumno ban pynïaid shaphrang bad ban pynkhlaiñ shuh shuh ïa katei ka skul.
Kumta mynta u snem ka KJP Synod Sepngi ka la sdang ban tei ïa ka ïng skul kaba thymmai khnang ba kan longkaba neh bad kaba skhem.
Ka jingsdang jong ka Tynghor Presbytery ban seng ïa katei ka English school ka dei tang ha ka kyrdan Primary bad katba nangïaid ki snem ka jing don jong ki khynnah ka la nang kiew bad nang roi .
Kumta hadien ba ka KJP Synod Sepngi ka la ïoh jingtip ka la ïakren bad ki nongkitkam jong ka Tynghor Presbytery bad kyrpad ba kin aiti noh ha ka KJP Synod ban pynïaid ïa katei ka skul.
Na ka liang ki nongkitkam jong ka Tynghor Presbytery ruh ki la ïa mynjur lang ban aiti noh sha ka KJP Synod ba kan pynïaid ïa katei ka skul.
Haba pyrshang ban kylli na ki nongshong shnongkatei ka thaiñ ha kaba ïadei bad katei ka skul ki la ong ba kat kum ka jingtip jong kin a ka liang ka KJP Synod kan sa kyntiew kyrdan shuh shuh ïa katei ka skul bad mynta u snem kan plie shuwa haduh ka klas IX bad hadien kan sa nag kyntiew plie shuh shuh haduh ki kyrdan kiba kham ha jrong.
