Mawkyrwat, Risaw 02: Ka ophis jong ka District Social Welfare Officer, South West Khasi Hills District ha ka 1 tarik u Risaw, 2022 ka la ïoh ban rakhe ïa ka sngi ba kyrpang ka ‘International Day for Older People’ ne ‘Sngi burom ïa ki briew kiba na ka karta’ kaba ka phang pdeng ka dei, “Resilience of Older Persons in a Changing World” ha kaba ïa kane ka jingrakhe la pynlong jong ka Balang Mawlangwir Higher Secondary School, Mawlangwir.
Ha kane ka sngi ba kyrpang na ka liang ka ophis DSWO ka la ïoh ruh ban leh burom kyrpang ïa i mei-ieid Theresia Lyngdoh iba la kynjoh ïa ka karta kaba 90 snem iba dei i nongshong shnong ba la tymmen tam hapoh jong ka shnong Mawlangwir, South West Khasi Hills District bad bud ka jingai sngewbha ïa baroh ki tymmen ki san kiba la wan sha kane ka jingrakhe ba kyrpang.
U Dr. F.R. Lartang, District Medical & Health Officer, South West Khasi Hills District ha ka jingrakhe u la ïoh ban kren halor ka jingsumar ïa ka jingkoit jingkhiah jong ki tymmen (Geriatric Healthcare Management). Ha kaba ïa dei bad kane, u Dr. Lartang u la ban jur ïa ka jingdonkam ban sumar ïa ki tymmen ki san. Kumjuh ruh u la ïathuh ruh shaphang ka jingpang ba ki tymmen ki ïa kynduh bad kumno ban sumar ïa ki.
Shuh shuh, u Dr. Lartang u la buh ruh ki katto katne ki jingkyntu ïa ki tymmen ki kro ba kin long kiba phikir ha ki liang baroh la ha ka ïaid ka ïeng, ka trei ka ktah bad ka pang ka shitom. Ha kaba ïa dei bad ka bam, u la kyntu ïa ki ba kin da bam kat ban biang bad kumjuh ruh ïa ki jingbam kiba tei. Ha kaba ïa dei bad ki kam ha ka imlang ka sahlang, u Dr. Lartang u la kyntu ba kim dei ban im marwei. “Haba ki don hapdeng ki jingkhuslai bad jingnoh mynsiem, u la kyntu ba kim dei ban kun tang ha lade ïa kita hynrei ki dei ban ïathuh lem.
U Dr. Lartang haba kren shaphang kumno ban tip ïa ka jinglah jong ki tymmen ki san ban leh ne trei kino kino ki kam, u la ai jingmut ruh ba lada dang lah ban leh, dei ban leit beit hynrei lada ka met kam ai lad shuh dei ban kiar khnang ba kan nym wanrah kano kano ka jingeh. U la air uh ka jingpynshlur na ka bynta ki tymmen ba kin sumar ïa ka koit ka khiah da kaba phah thew ïa ka ‘BP’ bad shini man ka por lane shisien ha ka shisnem.
Ha kane ka sngi u la kren ruh shaphang ki lad jingïarap kiba pher bapher kiba wan na ka sorkar kaba dei na ka bynta ki tymmen ki san bad ba kin shim kabu ïa kiba kum kita na ka bynta ka jingmyntoi jong ki hi. Kyntang ïa wai, u Dr. Lartang u la ai mynsiem ïa baroh kiba la wan ha kane ka sngi ba kin don ka jingsngewtynnad ïa la ka jong ka jingim watla ki don hapdeng ka jinglong tymmen.
U bah F. Khongwar, Elder Helpline, In-charge jong ka South West Khasi Hills District u la kren halor ka Maintenance Act 2007 bad halor u Elder Helpline Number ba 14567. U la ïathuh ba ka jingthmu jong kine ka long ba ki tymmen ki san kin ïoh jingïada ïa ka jingim bad kumjuh ruh ïa ki jingdon jingem jong ki. U la ai jingtip ruh ba lada ki don kino kino ki jingdonkam, ki lah ban phone ha u 14567.
Ha kane ka jingrakhe jong ka sngi ba kyrpang jong ki tymmen san, la ïoh ruh ban pynshit pynshngaiñ da ka jingrwai kyrpang na u samla Regelbertson Wanniang bad kumjuh ruh ka skit ba lyngkot na ka NKD Wann, Mawlangwir.
Ïa ka jingïalang ha kane ka sngi la pynïaid da ka kong H. Sahkhar, In-charge District Social Welfare Officer, South West Khasi Hills District bad bud ruh ka jingkren lyngkot na u Myntri jong ka Shnong Mawlangwir, bah N.S. Wanniang bad la jingaikhublei na ka kong P. Lyngkhoi.
