Shillong, Jylliew 25: Ka tnat Animal Husbandry and Veterinary ka la pyntip ba haduh 8,177 tylli ki masi kiba la ïoh ïa ka jingpang at snieh doh (Lumpy Skin Disease) naduh ba kane ka jingpang ka la sar ha ka jylla Meghalaya baroh kawei.
U Secretary jong ka tnat AH&Vety u C. Manjunatha haba ai jingtip kaba bniah, u la ïathuh ba 5,884 tylli ki masi la lah ban pynkoit na ka jingpang at sniehdoh, katba 101 tylli ki masi ki la ïap ei na kane ka jingïabit ïa kane ka jingpang.
Ïa mynta, ki don 2,192 tylli ki masi kiba ïabit jingpang kiba dang don hapdeng ka jingshah sumar.
Ka tnat ka la pyntip ruh ba ki don haduh 28,595 tylli ki masi kiba la ïoh injek tika ban ïada na ka jingsaphriang ka jingïabit ïa ka jingpang at sniehdoh.
Ha kajuh por, u Manjunatha u la pyntip ba ïa ka jingpang African Swine Fever (ASF) la lah ban ïada ha kane ka jylla.
Haduh mynta, kam don shuh kano kano ka jingjia kaba ki sniang kin ïap na ka jingïabit ïa ka jingpang ASF hadien ba la pynthikna ïa ka jingïap jong ki sniang kaba la jia ha ka 2 tarik mynta u bnai ha Ri Bhoi district.
Katkum u Secretary, haduh 238 tylli ki sniang ki la ïap na ka jingpang ASF naduh ba ka la sar ha kaba sdang jong u bnai Kyllalyngkot mynta u snem.
Ka tnat Animal Husbandry and Veterinary ka la ïaibteng ban peitngor bha ïa ka jingsaphriang jong ka jingpang bad shim ruh ïa ki lad ki lynti ban tehlakam ïa ka jingsaphriang ka jingpang at sniehnoh ha ki Masi bad ka jingpang African Swine Fever ha ki Sniang.
Kane ka jingtrei shitom jong ka tnat AH&Vety ka long ban ïada ïa ka koit ka khiah jong ki jingri jingdub ha kane ka jylla Meghalaya.
