Shillong, Nailur, 02: Ka Sorkar India lyngba ka Food Corporation of India (FCI) ka la pyllait paidbah ïa u kew bad ïa u khaw na ka kudam lyngba ka Open Market Sale Scheme (OMSS(D)).
Ïa ka dor jong u khaw ba la mang yn tyrwa hapoh ka OMSS(D) ba la pynhiar dor da T. 2 na ka T.31 sha ka T.29 shi kilo na ka bynta u khaw bym dei FRK bad T. 31.73 yn pynhiar dor sha ka T. 29.73 shi kilo na ka bynta u khaw FRK.
Ka FCI, RO NEF Region na ka bynta ka jylla Meghalaya, Mizoram bad Tripura ki la sdang ban die ïa u kew bad ïa u khaw hapoh ka OMSS (D) sha ki nongthied ba la ïoh jingithuh naduh ka 28 tarik, Jylliew 2023.
Ïa u kew la tyrwa sha ki karkhana tylliat atta, moida, bad ki nongpynmih jingbam kew hynrei ym sha ki nongkhaii, katba ïa u khaw la tyrwa sah ki nongkhaii ba la ithuh kiba ju thied na ka por sha ka por.
Ha ka jingdie lilam haduh mynta, palat 4150 Metric Ton u kew bad 1900 Metric Ton u khaw la die na ki kudam buh kaw bapher bapher kiba hap hapoh ka NEF Region. Na ka bynta ka jingdie lyngba ka e-auction ka ban sdang naduh 6 tarik, Nailur, 2023 haduh 800 Metric Ton u kew bad 3000 Metric Ton u khlaw yn tyrwa lyngba OMSS (D) scheme.
Ban pynmyntoi ïa ki nongbam bad ïa ki paidbah, ka FCI ka khmihlynti ba kan don ka jingïashim bynta na ki nongthied ba la ïoh jingithuh ha ka jingdie lilam ka ban sa long. Shuh shuh u kew ban sa thied da ki karkhana tylliat atta, moida bad ki nongshna jingbam na ka FCI lyngba OMSS (D) kin hap ban pynmih ïa u jingbam kew bad ban pyllait sha iew na ka bynta ban die hapoh 30 sngi naduh ka tarik ba khatduh ba la pyllait.
Ka Notice Inviting Tender (NIT) yn sa thep manla ka sngi Thohdieng ha ka MJUNCTION Portal ban pynbud pat sa ka jingdie lilam ha ka sngi Balang. Ïa dor jong ka EMD dei ban thep da ki nongthied ha lane shwa ka lah sngi u Blei shwa ka 6 baje janmiet na ka bynta ka jingdie lilam na ka bynta ka sngi Balang jong ka taiew kaba bud.
