Shillong, Jylliew, 18: Kawei ka longkmie na kawei ka shnong kaba hap hapoh ka West Garo Hills ka la ujor sha ki Pulit ba ha ka 5 tarik, Risaw, 2021, uwei u briew uba la tip kyrteng kum u Abdul Salam Shah, u la kam ba u dei uwei na ki nongïalam jong ka seng saiñpyrthei bad u don ruh ka jingïadei kaba jan bad u Myntri ka tnat Kam Pohiing ka Sorkar India u la shukor ïa kane ka longkmie kat haduh ba u la ïoh tuh ïa ka pisa kaba kot 8 lak da kaba kular ban pynïohkam sorkar ïa u khun jong ka ha ka tnat shipai BSF.
Ka Manju Roy kaba la leit mih sha Dobasipara Out Post, West Garo Hills ha ka 13 tarik Jylliew, ka la ujor da ka ktien ba ki runar ki bym lah ban ithuh ki la prong tuh hapoh ka ing jong ka bad ïoh rong ïa ka pisa T. 52,000 hajar bad ki ksiar ki ksah kiba shongdor kumba T. 1 lak.
Ka Enora A Sangma ka la ujor sha ki Pulit ba ha ka 15 tarik Jylliew ha ka por kumba 5.20 baje janmiet uwei u briew ba la tip kyrteng kum u Tyson K. Marak (34 snem), u la dung pynmynsaw ïa ka da ka tari ha Upper Wadanang, Jangga, Tura, West Garo Hills. Ha kane ka jingjia, ïa ka nongujor kaba la mynsaw la pynkynriah sha Civil Hospital, Tura ban ïoh jingsumar.
