8 kynta tam thwet ka HYC ïa ki nongdih drok kylleng ka sor Shillong, ïoh bat 20 ngut

Shillong, Naitung, 21: Ki dkhot jong ka Hynñiewtrep Youths Council (HYC) Seng Kmie ba la lamkhmat da u Secretary u Bah Isaac Basaïawmoit ryngkat ka jingsynran lang jong u Vice President Bah Donboklang Kharlyngdoh ki la bteng ban thwet ïa ki nongdih drok ha ki jaka paitbah ha ka miet Sngi Saitjain naduh ka por 5:00 baje janmiet tad haduh ka sngi u Blei ha ka por 1:30 baje mynstep kaba la kot jin phra kynta tam.
Ha u kyrwoh ba la phah da u Publicity Secretary u Bah Bashan Lyngdoh Mawnai ryngkat bad ki video ba la ring hi da ka seng, la ïathuh ba ha kane ka jingthwet, ki dkhot ka HYC ki la ïoh bat kumba 20 ngut ki samla Khasi bad kumjuh ruh ki bar jylla ha kaba la sdang ïa ka jingthwet ïa ki nongdih drok na ka thaiñ Polo ter ter sha Motphran, Iew Mawlong haduh Stand Bhoi.
Ha ka jingtalasi na ka met jong ki 20 ngut ki nongdih drok bad na ki nongdie, ki dkhot ka HYC ki la ïoh ban kurup 15 tylli ki tyndong plastik ba la pyndonkam ban thep ïa u drok, ka kiad, ka Beer, u Ganja, ki thyrnia injekshon, ka tari bad ka pisa.
Hadien ba ladep kurup, ka seng ka la thang da ka dieng ïa u drok ha kane ka step ha khmat jong ki nongdih bad nongdie drok. Ki nongïalam ka seng ki la bthah ruh ïa kine ki samla ba kin phah wan ïa ki bahaing hasem bad ïathuh ruh ba na kine ki 20 ngut, 3 ngut ki samla la ïalam syndon sha Rehabilitation Centre kaba don ha Assam da ka jingmynjur jong ki kmie ki kpa.
U Bah Isaac Basaïawmoit u la ong wat hapdeng ka jingïai khot hajir jong ki bor jong ka aiñ ïa ki nongïalam ba hakhmat ka ishu Lum Survey, ka ishu drok ha ka seng hi kan ym riej, kan ym tieng hynrei kan ïai bteng ban ïai khynra drok namar ka seng ka tip shai ba lada duna ki nongdih bad ki nongdie drok ki kam sniew ruh ki duna hapoh ka ka jylla.