Shillong, Jymmang 10: Ka Meghalaya ka la sei lut ïa ka sap jong ka ban pynkylla khongpong ïa ka jingïalehkai hadien ba shah lamkhmat shuwa da shi kol ban pynliem ïa ka West Bengal da 3-1 kol ha ka lympung ïalehkai phutbol jong ki khynnah shynrang jong ka 7th Khelo India Youth Games ha Begusarai, Bihar ha ka sngi Saitjaiñ.
Ka West Bengal ka la ïoh ban lamkhmat nyngkong lyngba ka kol jong u Irfan (61’minit) shuwa ba u Mebanlamlynti Masharing (78’P, 87′ minit) un pynkhihwin ïa ka jingïalehkai da kaba thep ar kol bad nangta ka kol jong u Iaishanbok Buhphang (90’+10 minit) ha ki minit pynjlan jong ka por ka la pynthikna ïa ka Meghalaya ban khur ïa ka jingjop.
U referee u la ai kham bun minit ban pynjlan ïa ka por shuwa ban wai tang namar ka jingïakynad kaba la neh slem hapdeng ki rangïalehkai jong kine ki arliang mamla – kaba la ïalam ïa ka West Bengal ban shah pynduna 2 ngut ki rangïalehkai bad hap ban bteng ïa ka por ba dang sah jong ka kylla miet da tang 9 ngut ha madan.
Da kane ka jingjop ka resol jong ka Group A ka paw ba ka Meghalaya, kaba dang ïakhun ban ïada ïa ka burom lahduh, ka la ïoh ban rung sha ka semifinal kum kawei na ki ar tylli ki kynhun ba wan hakhmat duh na katei ka Group.
Ha kawei ka liang, ka Odisha ka la dep ban pynthikna ïa ka jaka ha ka semis shuwa ka jingïakhun ha katei ka sngi da kaba jop ha baroh ar sien pyrshah ïa ka WB bad ka Meghalaya. Napdeng kine ki ar kynhun, ka Meghalaya ka don ïa ka jingïapher kol kaba kham bha ban ïa ka West Bengal (+8 da +4) bad kumta ka donkam tang ïa ka jingïakhaid ban jam shakhmat.
Hynrei wat hapdeng ki lad kiba bun bha ha ka kylla step (kynthup ïa ka penalty kaba la shah khanglad ha u rangapkol ka West Bengal), ka Meghalaya kam shym la lah satia ban ïoh ïa ka kol lamkhmat bad dei ka kynhun liang pyrshah kaba la ïoh ban thep ïa ka kol kaba nyngkong ha ka minit kaba 61 lyngba u Irfan.
Katba dang ïaid ki minit ka por ka la kylla long ka nongshun jong ka Meghalaya hynrei ka penalty kaba ar (ha kane ka kynti la ïoh namar ka hand ball) ka la pynïoh ïa ka Meghalaya ban pynïakhaid hadien ba u Mebanlamlynti u la lah ban thep ïa ka penalty. Hadien nangta u la buh ïa ka Meghalaya hakhmat da kaba shu pyndei tiak ïa ka bol ba la pashat na bynta jong u hapoh phyllaw kol.
Ka West Bengal kam shym la sngewtynnat satia ïa ka jingkylla ha ka jingïalehkai hynrei u Iaishanbok u la pynthikna ïa ka Meghalaya ban khur ïa ka jingjop lyngba ka kol kaba itynnat na ka free-kick.
Ka jingïakhun kan long ha kane ka sngi Nyngkong.
