Shillong, Risaw 17 : U Myntri Rangbah ka jylla u Conrad K. Sangma mynta ka sngi Baar ula ong ba palat 70,000 ngut ki samla ki dei kiba la kynjoh ha ka rta ban trei ban ktah (work force) man la u snem bad ka long kaba kongsan ïa ka sorkar ban thaw ïa ka polisi ka ban plie lad ïa ki ban rung kam ha kiwei kiwei ki jaka ruh.
“Ka jingdawa ban ïoh kam ka long kaba jur bha bad kam long kaba suk ïa ka sorkar ban thep kam lut ïa baroh ha ki tnad treikam jongka. La jan kumba 1500 ngut ki la ïoh kam ha ki tnad sorkar lyngba ka Meghalaya Public Service Commission (MPSC) bad District Selection Committees (DSC),” ula ong haba kdew ïa ka jingdonkam ban thaw ïa ki lad sengkam sengjam la jong ka ban kyntiew ïa ka ïoh ka kot ka Jylla.
Haba plie ïa ka programme CM Elevate ha Jowai ha ka jingïadon lang ki MLA u Bah Wailadmiki Shylla bad ka Kong Santa Mary Shylla, u Myntri Rangbah ka jylla u Conrad K Sangma ula ong ba ka sorkar ka la sdang ïa kane ka prokram ban pynshlur bad ban kyntiew ïa ka jingseng kam lajong da kaba kyrshan ïa ki 20000 ngut ki nongïoh jingmyntoi ha ka jinglut jingsep kaban kot T.300 Klur ha ki 5 snem ki ban wan.
Lyngba ka CM – Elevate, ki nongseng kam lajong ki lah ban applai ïa kiba bun ki lad treikam ki ban kyntiew ïa ka kam jngohkai, ka rep ka riang, ki kam pynbyrngia bad kiwei kiwei. Lyngba katei ka scheme ka sorkar jylla kan ai Grant bad Subsidy haduh 75% bad ïa kaba tam yn sa pynïasoh bad ka ram kaba na ki Bank.
“Ngi la wanrah ïa ka policy ban kyntiew ïa ka jingseng kam lajong ban ïakhun pyrshah ïa ka jingkyrduh kam kyrduh jam. Kane ka polisi kaba mynta kan long ka lad ka ban pynbeit ïa ka mat ha kaba ïadei bad ka jingthaw ïa ki kam ha ki 10-15 snem ki ban wan” ong u Conrad ryngkat ka jingbanjur ba ka programme kum ka PRIME bad CM – Elevate kan btin, ai jinghikai bad pynkup bor ïa ki samla ban donkti ha ki kam ki ban ai jingmyntoi.
“Lymda bad katba ym pat thaw ïa ki policy mynta, ngin mad ïa ka jingeh kaba khraw ha ki pateng ban wan. Kumta ka long kaba donkam \ïa ngi ban tuklar ban pynthikna ba kata ka jingeh dei ban pynbeit noh” ula ong.
Ula pyntip ba palat 33 Lak ngut ki briew ha ka jylla ki dei kiba don hapoh jong ka 45 snem ka rta bad ka mat jong ka jingpynmih ïa ki kam kan ïai bteng ban kiew bad kan buh ha ka jingeh ïa ka jylla.
“Mynta kumba 70,000 ngut ki briew ki rung ha ki kam bapher bad kane kan sa kiew sha ka 1 lak ha ki snem ban wan” ong u Conrad bad ka banjur ba ka sorkar ka la pynwandur ïa ka CM – Elevate ban weng ïa ka jingeh kaba ïadei bad ka jingkyrduh kam kyrduh jam bad ban thaw ïa ka sawdong sawkun da kaba thaw ïa ki lad aikam aijam.
Ula pyntip ba ha ki 5 snem ban wan lyngba ka CM – Elevate, ka sorkar ka buh ïa ka thong ban thaw palat 50,000 tylli ki kam ha ka jylla ha ka liang jongka jingseng kam lajong.
Da kaba pynpaw ba ka jingkhlaiñ ka jylla ka dei namar ka jingdon ki samla, kumta ka programme kum ka YESS Meghalaya ka ai ïa ka lad ïa ki samla ba kin don bynta ha ki kam ki ban pynthikna ba ka bor ka jongka la pynleit ha ka ban leh ïa ki kam kiba don jingmut bad kiba bha.
Ka YESS Meghalaya, kaba dei kaba la pynwandur da u Myntri Rangbah ka jylla u Conrad K. Sangma, la sdang ha u snem 2022 kaba kyrshan ïa ki kynhun jong ki samla, ki society, kynhun trei mon sngewbha kiba pan jingkyrshan pisa haduh T.1 Lak na ka bynta ban ai ki jingpynsngewthuh paidbah, ki kam ai jinghikai bad kiwei kiwei.
“Ha kine ki shi snem kiba la leit, 1155 tylli ki kynhun jong ki samla ki la ïoh jingkyrshan na ka sorkar jylla bad ngin bteng ban kyrshan ïa ki samla lyngba katei ka programme”, ula pyntip.
Ha ka programme kaba mynta ka sngi, la sam ïa ki 37 tylli ki ‘Cheque’ lyngba ka Yess Meghalaya, Green Meghalaya bad SHG kaba kot baroh T. 1.25 Klur.
