Ka jingbym ïoh kam ïoh jam ne ka unemployment problem ka dei kawei na ki jingeh jong kine ki sngi ba mynta khamtam lei ha ka jingwan jong ka khlam Covid 19, ka la ktah jur ïa ka ïohkam ïoh jam jong ki samla ha ka jylla bad ha ka ri hi baroh kawei. Wat ki samla kiba la don bad trei ha ki kam bapher bapher naduh kiba trei ha ki Kompeni, ha ki Hotel, ki Karkhana bad ruh ki kam khaïi ki la ïakynduh jingeh shibun namar jong ka jingdon jong kane ka khlam .Hooid kane kam dei tang kata ka por kaba ki samla ki kynduh jingeh bad ka ïoh kam ïohjam hynrei mynta la katto katne phew snem ka ïohkam ïoh jam kam dei satia kaba suk na ka bynta ki samla wat ha ba ki la pyndep ïa ki jingpule kiba har rukom.
Kawei na ka daw jong ka jingbymïoh kam ïohjam ka dei namar ba kat kum ba ka long hi ha ka jylla jong ngi bun ki samla kim shym la hikai kumno ban nang ban trei ïa ki kam, hynrei kiba bun ki jingpule hi ki long beit ban trei ia ki kam sorkar ne ki Administrative services. Kumta ha kiba bun kiwei pat ki kam la ïohi ba la pyndap nongtrei beit tang da ki briew kiba wan na bar ka jylla. Kumta ha kane ka spah snem kaba mynta ka long kaba donkam ba ka sorkar ban thaw ïa ki lad ki lynti kumno ban pynlong ïa ki samla kiba lah ban trei wat ha la ki jong ki kam la jong da kaba pynïoh sha ki ia ki lad jinghikai kiban ïahap dur kat kum ka jingdawa jong kane ka juk mynta. Ka long kaba donkam ban shimkhia na ka bynta ka lawei bad ka ïoh kam ïoh jam da kaba trei beit ïa kino kino ki kam kat kaba shah, naduh kaba buh dukan, die jingdie, khap sñiuh, suh juti, shet jingbam, haduh ha kaba trei ha ki kompeni kum ki sales bad ruh ki kam ba ïadei bad ki paidbah.
Ka por ka la dei eh ba ka sorkar kan shim khia lem ban plie noh da ki jaka ai jinghikai trei kam nalor jong ki skul kiba la don lypa. Ha kane ka juk mynta ki samla ki donkam ïa ki buit kumno ban lah ban trei ïa ki kam naduh kaba shna ïa ki tiar haduh kaba pynïaid ïew ïa ki. Ka jingai jinghikai ha kaba ïadei bad ka khaii pateng bad ruh ka khieñ ka diah ka long kaba donkam khnang ban pynsuk ia kiba bun kito kiba ieh skul noh shiteng por ban sngewthuh khambha kumno ban pynïaid ïa ki kam la jong. Ha ka juh ka por ka jinghikai halor kaba iadei bad kumno ban ïoh ïa ka baiseng ban dang lyngba ki jingïarap jong ki Bank ka long kaba donkam bha khnang ba ki briew kin sngewskhem ban trei ha ki kam la jong bad ba kin lah ban kyrshan ïa ka jingdonkam jong ki longïing long sem jong ki.
Ka jingiatreilang jong ki Shnong bad ruh ki sengtrei mon sngewbha ka long shisha kaba donkam ban pynïoh ïa ka jingai jinghikai halor kumno ban trei ïa ki kam kiba hakhmat eh. Namar ba kat kum ba ka long mynta kiba bun ki briew ki trei ïa ki kam dukan, die jingdie bad ruh shet ïa kino kino ki jingbam ne thaw ïa kino kino ki jait tiar tang da kaba pynshang hi na lade, hynrei la lada kan don shisha kata ka skul ban da ai jinghikai ha man la ki shnong kan ïarap shibun eh ia ki samla kiba duh lad ban bteng ïa ki jingpule kiba kham sha jrong jong ki. Ka jingiashimbynta jong ki bor pynïaid shnong ban maitphang ia kum kane ka kam kan long ka jingpyrtu kaba ai jingmyntoi ïa ki paidbah khamtam ki samla kiba dang hap ban ïaid sha ka lawei.
Haba peit ha kine ki sngi teng teng ka long i duhnong ban peit ba ki samla ki la pyndep ïa kiba bun ki jait jingpule hynrei ka kam pat ka jngai bha na ki. Kumta ha kaba kut kum banse ban trei la ka trei da kano kano ka kam kaba ym don jingïadei ei ei satia bad ka jingpule ka jong ki, hynrei ka shu long pat ka lynti kaba kham iar namar ba ki la don ia ka jingnang jingtip ha kaba iadei bad kumno ban hikai dalade ia lade namar ba ki la lah ban pule bad shah hikai wat tang lyngba ki bor ki kor internet kane ka juk mynta.
Ka jingshisha jong ka jingeh jong ka jingbymioh kam ïohjam ka dei hi namar ba kiba bun ki samla ym shym la hikai ïa ki na ka bynta ban nang ban trei ïa ki kam, hynrei ki la pule na ka bynta tang ban trei ia ki kam sorkar beit bad kane ka buh jingeh kumba ka kam sorkar mynta ka la dap bad la shlei palat bad ki samla kin hap ban ap da bun snem tad haduh ba kin da ïoh lad ban trei ïa ka kam bad bun na ki ka rta trei kam jong ki ka la shu kut noh bad ka jingpule jong ki kam lah ban ai jingïarap ia ki 100% kumba la khmih lynti.